پێشمەرگەی لیواکان و یەکەی 80 سوودمەند دەبن لە وەرگرتنی زەوی

ئاڤا نیوز

نزیکەی 100 هەزار پیشمەرگەی یەکەی 80 و لیواکان لە سنووری پارێزگای دهۆک کە بە شێکیان 28 ساڵ خزمەتیان هەیە و ماوەی 15 ساڵە فۆڕمی وەرگرتنی زەوی پڕدەکەنەوە، بەڵام تاوەکو ئێستا سوودمەند نەبوون، داوایان لە ئاڤا کردووە تاوەکو بەدواداچوونیان بۆ بکات لەسەر ئەوەی ئایا هاوشێوەی فەرمانبەرانی دیکە زەوییان پێدەدرێت یاخود نا؟

 چیرۆکی سەرەکی: پێشبینی دەکرێت لەم هەفتەیە فۆڕمی زیاتر لە 180 هەزار فەرمانبەر بۆ وەرگرتنی زەوی لەلایەن ئەنجوومەنی وەزیرانەوە پەسەند بکرێت و وەزارەتی شارەوانیش سەرقاڵی پێداچوونەوە و وربینیکردنە لە فۆڕمەکانی قۆناغی سێیەمی دابەشکردنی زەوی.

زانیاریی زیاتر: پێشمەرگە و فەرمانبەر و خانەنشینانی یەکەی 70 و 80 پێشووتر بڕیار نەبوو زەوی وەربگرن، چونکە ئەو کەسانەی زەوی وەردەگرن دەبوو لە چوارچێوەی وەزارەتەکانی حکومەتی هەرێمی کوردستان بن، بەڵام ئێستا وەزارەتی پێشمەرگە ئەو بابەتەی یەکلاکردووتەوە و زەوی بەوانیش دەدرێت. 

لێدوانی فەرمی: سەربەست مەولوود، سەرپەرشتیاری پرۆسەی دابەشکردنی زەوی له‌ وه‌زاره‌تی شاره‌وانی بە ئاڤای ڕاگەیاند، فۆڕمی هەر فەرمانبەر، پێشمەرگە و خانەنشینێک ئاڕاستەی وەزارەتی شارەوانی بکرێت، دوای وردبینی ڕەوانەی ئەنجوومەنی وەزیران دەکرێت دوای گەڕانەوەی ڕەزامەندی زەویان پێدەدرێت. 

-    دەیان هەزار فۆڕم ئێستا لە پڕۆسەی وردبینیدان، لە قۆناغی سێیەمی پڕۆسەی دابەشکردنی زەوی ناوی وەزارەتی پێشمەرگە و یەکەی 70 و 80 زیاد کراوە و زەوییان پێ دەدرێت.