ماکرۆن: ئامادەم پێشوازی لە سەرۆکی سووریا بکەم

 

ئاڤا نیوز

سەرۆکی فەرەنسا ئامادەیی خۆی بۆ پێشوازیکردن لە ئەحمەد شەرع، سەرۆککۆماری سووریا بۆ قۆناغی ڕاگوزەر ڕاگەیاند، ئەگەر حکومەتی سووریا بە ڕووی کۆمەڵگەی مەدەنی بکرێتەوە و پابەندبێت بە دەستەبەرکردنی ئاسایشی گەڕانەوەی ئاوارە سوورییەکان.

وێنە گەورەکە: دوای وەرگرتنی دەسەڵات لە لایەن ئەحمەد شەرع، زۆربەی وڵاتان ئامادەیی خۆیان دەربڕیوە مامەڵەی دیپلۆماسی لەگەڵ سووریای نوێ بکەن، بەڵام بەشێکی زۆریان مەرجیان بۆ ئەو پەیوەندییانە هەیە.

لێدوانی فەرمی: ئیمانوێل ماکرۆن، سەرۆکی فەرەنسا ڕایگەیاند، حکومەتێک کە هەموو پێکهاتەکانی کۆمەڵگەی مەدەنی سووریا لەبەرچاو بگرێت، شەڕێکی ڕوون و یەکلاکەرەوە دژی تیرۆر بکات و هەوڵبدات بۆ گەڕانەوەی ئاوارەکان، دەتوانێت سێ توخمی بنەمای دادوەری قۆناغی ڕاگوزەری پێکبهێنێت.

بەپێی پێشهاتەکان ئامادەکارییەکی تەواومان بۆ درێژەدان بۆ گفتوگۆکان لەگەڵ سووریا و پێشوازیکردن لە ئەحمەد شەرع کردووە، گفتوگۆکان زۆر ئەرێنی بوون.

باکگراوند: دوای ڕووخانی ڕژێمی بەشار ئەسەد حکومەتی ڕاگوزەری سووریا ڕووبەڕووی ئاڵنگاری گەورە بووەتەوە، بەجۆرێک لە چەند هەفتەی ڕابردوودا، لە بەشی ڕۆژئاوای سووریا لە نێوان پاشماوەکانی ئەسەد و حکومەتی سووریا ڕووبەڕووبوونەوەی چەکداری ڕوویدا و بەسەدان کەس کوژران و برینداربوون، هاوکات پێکهاتەکانی سووریا داوایانکرد لە دەستووری کاتی سووریادا مافەکانیان جێگیربکرێت.