نەتانیاهۆ: ڕێگەنادەین ئەوەی پێش 7ـی ئۆکتۆبەر ڕوویدا دووبارەببێتەوە

 

ئاڤا نیوز

دوای هێرشەکانی ئەمڕۆی حزبوڵڵا لە باشووری لوبنانەوە بۆ سەر ئیسرائیل، سەرۆکوەزیرانی ئیسرائیل هۆشداری دەداتە حزبوڵڵا و دەڵێت، هیچ دەستدرێژییەک بۆسەر خاکی ئیسرائیل بەبێ سزا نابێت.

وێنە گەورەکە: لە دوای ڕاگەیاندنی ئاگربەست لەنێوان حزبوڵڵا و ئیسرائیل، ئەوەی دووەمیان بەردەوام بووە لە هێرشە ئاسمانییەکانی بۆسەر ناوچەکانی باشوور و ڕۆژهەڵاتی لوبنان، سووپای ئیسرائیل دەڵێت، ئامانجیان لەو هێرشە ئاسمانیانە کردنە ئامانجی ئەو گرووپانەی حزبوڵڵایە کە ئاگربەست پێشێل دەکەن.

لێدوانی فەرمی: بنیامین نەتانیاهۆ، سەرۆکوەزیرانی ئیسرائیل ڕایگەیاند:

٠ ئەوانەی هێشتا نازانن چی لە دۆخی ئێستای ناوخۆی لوبنان هاتووەتە ئاراوە، ئەمڕۆ نموونەیەکی دیکە تۆڵەکردنەوەی ئێمەیان بینی.

٠ هاوکێشەکە گۆڕاوە، ئەوەی پێش هێرشەکانی 7ـی ئۆکتۆبەر ڕوویدا دووبارە نابێتەوە. ئێمە ڕێگە بە هێرشکردنە سەر هاوڵاتیانمان نادەین.

٠ ئێمە بەردەوام دەبین لە جێبەجێکردنی ئاگربەست و هێرش دەکەینە سەر هەر شوێنێکی لوبنان کە بزانین هەڕەشەیە بۆ سەر دەوڵەتی ئیسرائیل.

بۆچوونی لایەنی بەرامبەر: حزبوڵڵا ڕایگەیاند، دووپاتیدەکەنەوە پابەندن بە ڕێککەوتنی ئاگربەست و ڕەتیدەکەنەوە هیچ دەستێکیان لە هەڵدانی ئەو موشەکانە هەبێت کە ئەمڕۆ لە باشووری لوبنانەوە بۆ ئیسرائیل هەڵدران.

ئەمەش بزانە: بەپێی ڕێککەوتنی ئاگربەست، دەبوو تا ڕۆژی 18ـی شوبات ئیسرائیل لە تەواوی خاکی لوبنان بکشێتەوە، بەڵام هێشتا سووپاکەی لە پێنج ناوچەی لوبنان هێشتووەتەوە. هاوکات، دەبێت حزبووڵڵا بنکە و هێزەکانی لە نزیک سنوورەکانی ئیسرائیل دووربخاتەوە.