واشنتن هاووڵاتیانی لە گەشتکردن بۆ سووریا ئاگادار دەکاتەوە

ئاڤا نیوز

باڵیۆزخانەی ئەمریکا لە دیمەشق داوای لە سەرجەم هاووڵاتیانی دەکات بەپەلە وڵاتەکە بەجێبهێڵن و هۆشداری دا لە زیادبوونی ئەگەری هێرشکردنە سەر باڵیۆزخانەکان و دامەزاوەکان لە جەژنی ڕەمەزاندا.

 

ڕاگەیێنراوی فەرمی: بەگوێرەی ڕاگەیێنراوی باڵیۆزخانەی ئەمریکا لە سووریا، ‏وەزارەتی دەرەوەی ئەمریکا هاووڵاتیانی ئاگادار دەکاتەوە لە ئەگەری زیادبوونی هێرش لە کاتی پشووی جەژنی ڕەمەزاندا کە لەوانەیە باڵیۆزخانە و ڕێکخراوە نێودەوڵەتییەکان و دامەزراوە گشتییەکانی سووریا لە دیمەشق بکرێنە ئامانج.‏ ‏شێوازی هێرشەکانیش بریتیین لە هێرشی تاکەکەسی، چەکداری، یانیش بەکارهێنانی تەقەمەنی.‏

‏
زانیاریی زیاتر: بەگوێرەی ڕاگەیێنراوەکە، هۆشدارییەکەی وەزارەتی دەرەوەی ئەمریکا لە ئاستی چوارەمدایە کە گەشت مەکەن. ئەم ئامۆژگارییە بە هۆی مەترسییە گەورەکانی تیرۆر، نائارامی مەدەنی، ڕفاندن، بارمتەگرتن، ململانێی چەکداری و دەستبەسەرکردنی نادادپەروەرانەیە.

 

- باڵیۆزخانەکە ئاماژەی بەوەشکردووە، ئەمریکا لە ساڵی 2012ەوە کارە دیپلۆماسییەکانی لە دیمەشق ڕاگرتووە، واتە ناتوانێت هیچ خزمەتگوزارییەکی کونسوڵگەری ڕۆتینی و فریاگوزاری پێشکەش بە هاووڵاتیانی وڵاتەکەی لە سووریا بکات.

 

- باڵیۆزخانەکە ڕوونی کردووەتەوە کە کۆماری چیک نوێنەرایەتی بەرژەوەندییەکانی ئەمریکا دەکات لە سووریا، داواش لە هاووڵاتیانی ئەمریکا دەکات کە پێویستیان بە هاوکاریی بەپەلە هەیە پەیوەندی بە بەشی بەرژەوەندییەکانی ئەمریکاوە بکەن لە باڵیۆزخانەی چیک.