شاندێک بە نوێنەرانی 50 کۆمپانیای ئەمریکی سەردانی عێراق دەکات

ئاڤا نیوز

باڵیۆزی عێراق لە واشنتن ڕایدەگەیێنێت، شاندێک بە نوێنەرانی زیاتر لە 50 کۆمپانیای ئەمریکی سەردانی عێراق دەکات.

 

چیرۆکی سەرەکی: شەممە 2025-3-29، نزار خەیرڵا باڵیۆزی عێراق لە واشنتن، لەگەڵ ستیڤ لوتس، جێگری سەرۆکی ژووری بازرگانی ئەمریکا و سەرۆکی ئەنجوومەنی بازرگانی ئەمریکا-عێراق لەگەڵ جێگرەکانی کۆبووەوە.

 

بڵاوکراوەی فەرمی: نزار خەیرڵا باڵیۆزی عێراق لە واشنتن لە پۆستێکیدا لەتۆڕی ئێکس ڕایگەیاند: لە کۆبوونەوەکە تیشک خرایە سەر گفتوگۆکردن لەسەر ڕێکخستنە لۆجستییەکان بۆ سەردانی داهاتووی شاندێکی بازرگانانی ئەمریکی بۆ عێراق، کە نوێنەری زیاتر لە 50 کۆمپانیای ئەمریکی لەخۆدەگرێت کە تایبەتمەندن لە وزە، چاودێری تەندروستی، پەروەردە، گواستنەوە و کەرتە گرنگەکانی دیکە.

 

لەلایەکی دیکەوە: هەفتەی ڕابردوو فەرهاد عەلا ئەلدین، ڕاوێژکاری سەرۆک وەزیرانی عێراق بۆ پەیوەندییەکانی دەرەوە ڕایگەیاندبوو، گەشەسەندنی ئابووری عێراق بووەتە هۆی ڕاکێشانی وەبەرهێنانی گەورەی ئەمریکا. چاوەڕوان دەکرێت شاندێکی باڵای ئەمریکا سەردانی عێراق بکات بۆ لێکۆڵینەوە لە دەرفەتەکانی وەبەرهێنان.

-  بەم نزیکانە عێراق پێشوازیی لە شاندێکی باڵا دەکات کە نوێنەری کۆمپانیا گەورەکانی ئەمریکی تێدایە بۆ گفتوگۆکردن لەسەر هەلی وەبەرهێنان و بەدەستهێنانی تێگەیشتن لە واقیعی نوێ و سەقامگیری عێراق، ئەمە جگە لە ئەنجامدانی کۆبوونەوە لەگەڵ بەرپرسانی حکومی و کۆمپانیا ناوخۆییەکان.