هەڵک تیڤی: دەمیرتاش دوای جەژن ئازاد دەکرێت

ئاڤا نیوز

 

هەواڵی ئازادکردنی سەڵاحەددین دەمیرتاش، هاوسەرۆکی پێشووی هەدەپە بووەتە بابەتی گەرمی میدیاکانی تورکیا، بەشێک لە ڕۆژنامەنووسان باس لە ئازادکردنی دەمیرتاش و ژمارەیەک لە ئەندامانی پێشووی هەدەپە دەکەن.

 

چیرۆکی سەرەکی: لە دوای دەستپێکردنی پرۆسەی ئاشتی لە تورکیا بە تایبەت دوای بانگەوازەکەی 27ی شووباتی عەبدوڵڵا ئۆجەلان، ڕێبەری پەکەکە بۆ هەڵوەشاندنەوەی پەکەکە، هەڵمەتێکی میدیای گەورە لە سۆشیال میدیا و کەناڵەکانی ئەو وڵاتە بۆ ئازادکردنی دەمیرتاش دەستیپێکردووە، ڕۆژانە داواکاری ئازادکردنی دەمیرتاش بڵاودەکرێتەوە. 

 

بڵاوکراوەی فەرمی: ئیسماعیل کوچوککایە، بێژەری کەناڵی هەڵک تیڤی تورکیا بە پشت بەستن بە سەرچاوەکانی لە ئەنقەرە دەڵێت: سەڵاحەددین دەمیرتاش دوای جەژن لە ماوەیەکی کورتدا ئازاد دەکرێت، چۆن ڕێککەوتنێک کراوە نازانم، بەڵام بە گوێرەی زانیارییەکان بە ئەگەرێکی زۆرەوە دەمیرتاش ئازاد دەکرێت. 

 

لەلایەکی دیکەوە: ڕۆژنامەنووس ڕەسیم ئۆزان، باسی لەوە کردووە، بە دڵنیاییەوە دوای جەژن دەمیرتاش ئازد دەکرێت، لەم دۆخەشدا کورد پێویستە تەنیا بیر لە بەرژەوەندییەکانی خۆی بکاتەوە.

-    ئۆزگور ئۆزێل، سەرۆکی جەهەپە و ئەکرەم ئیمام ئۆغلو، سەرۆک شارەوانی گەورەی ئیستەنبووڵ، لە ماوەکانی ڕابردوودا بەفەرمی داوای ئازادکردنی دەمیرتاشیان کرد.

- عەبدولڕەحمان کەڕەبوڵوت، کە یەکێک لە پارێزەرانی سەڵاحەددین دەمیرتاشە، لە 26ئاداری 2025، لە ئێکس وێنەیەکی سەڵاحەددین دەمیرتاشی بڵاوکردەوە و نووسی: "پەنا بەخوا جەژن لەگەڵمان دەبێت".

باکگراوند: لە 16-5-2024 دادگای تورکیا لەسەر دۆسیەی کۆبانێ، بڕیاری 42 ساڵ زیندانیکردنی بۆ سەڵاحەددین دەمیرتاش دەرکرد، ماوەی 8 ساڵە دەمیرتاش لە زیندان دەستبەسەرە.