بانکی TBI ناچار دەکرێت ATM لە شوێنە گشتییەکان دابنێت

 

ئاڤا نیوز

ژمارەیەک پێشمەرگە لە سلێمانی کە بەشدارن لە پڕۆژەی هەژماری من، ناڕازین لە بانکی TBI، لە بەرئەوەی ئەو بانکە ئامێری ATMـی لە ناوچەکەی ئەوان نیە. دەڵێن شوێنی وەرگرتنی مووچەکانمان بە کاش زۆر دوورە.

چیرۆکی سەرەکی: چەند پێشمەرگەیەك بە نوێنەرایەتیی 100 پێشمەرگە کە بەشدارن لە پڕۆژەی هەژماری من، سێ مانگە كارتی بانكیی بازرگانی عێراق  (TBI)ـیان وەرگرتووە، بەڵام تاوەكو ئێستا كۆدیان بۆ نەهاتووەتەوە و ناتوانن لە ATMـەکان مووچە وەربگرن.

لێدوانی فەرمی: نوێنەری ئەو پێشمەرگانە بە ئاڤای وت، کێشەکەمان بە تیمی هەژماری من گەیاند، گوتیان گرفتەكە ئەوەیە بانكی TBI، كە یەكێكە لە بانكە بەشدارەكانی هەژماری من، هیچ ATMـێکی لە شوێنە گشتییەكان نییە، بەڵكو تەنیا لەبەردەم خودی بانكەكە و چەند مۆڵێك هەیە، هەربۆیە ئێوە و خەڵكی دیكەش كە كارتی بانكی TBIـیان هەیە، نەیانتوانیوە مووچەكانیان لەڕێگەی هەژماری منەوە وەربگرن.

زانیاریی زیاتر: تا ئێستا 40 هەزار مووچەخۆر لە ڕێگەی بانکی TBI خۆیان لە پڕۆژەی هەژماری من تۆمارکردووە، 19 هەزاریان کارتیان وەرگرتووەتەوە. هەژماری من دەڵێت، دوای جەژن گفتوگۆیان لەگەڵ دەكەین بۆ ئەوەی بە زووترین كات ATM لە شوێنە گشتییەكان دابنێن. دەشڵێن TBI خاوترین بانکەکانی نێو هەژماری منە.