محەممەد حاجی مەحمود: ئەم جەژنە جیاوازە و لەگەڵ عێراق نین

ئاڤا نیوز

 

ئەمڕۆ لە هەرێمی کوردستان یەکەم ڕۆژی جەژنی ڕەمەزانە، سکرتێری حیزبی سۆسیالیست دیموکراتی کوردستانیش لەوبارەیەوە دەڵێت، "ئەم جەژنە جیاوازە و خۆمان بڕیارمان لەسەر داوە".

 

وێنە گەورەکە: ئەمڕۆ یەکشەممە 30-3-2025، لە هەرێمی کوردستان یەکەم ڕۆژی جەژنی ڕەمەزانە، هاوکات ئەنجوومەنی باڵای فەتوای عێراق کە سوننەن ئەمڕۆیان بە جەژن دیاری کردووە، بەڵام دیوانی وەقفی سوننە ڕۆژی دووشەممەیان وەک جەژن دیاری کردووە. هاوکات شیعەکانی عێراقیش دووشەممەیان بە جەژن دیاریکرد. 

 

لێدوانی فەرمی: محەممەد حاجی مەحموود، سکرتێری حیزبی سۆسیالیست دیموکراتی کوردستان بە ئاڤا میدیای ڕاگەیاند: ئەم جەژنە جیاوازە و خۆمان بڕیارمان لەسەر داوە، دەستخۆشی لە وەزارەتی ئەوقاف و کاروباری ئایینی دەکەم، هیوادارم بۆ هەموو شتەکان لەگەڵ عێراق نەبین و خۆمان خاوەنی بڕیاری خۆمان بین.

 

زانیاریی زیاتر: ئەو وڵاتانەی کە یەکشەممەیان کردووەتە جەژن، بریتین لە سعودیە، تورکیا، ئیمارات و قەتەر.

 

لەلایەکی دیکە: هاوکات ئەو وڵاتانەشی کە ڕۆژی دووشەممەیان کردووەتە جەژن بریتین لە ئێران، میسر، ئەندەنووسیا، پاکستان، هیندستان، مالیزیا و عومان.