ئێران: ناوەڕۆکی نامەکەی ترەمپ بڵاو ناکەینەوە

 

ئاڤا نیوز

وەزارەتی دەرەوەی ئێران ناوەڕۆکی نامەکەی دۆناڵد ترەمپ، سەرۆکی ئەمریکا و وەڵامەکەی ئێران بۆ ترەمپ ئاشکرا ناکەن و دەڵێن تا کاتێکیش کە بەرژەوەندیی وڵات بخوازێت بە نهێنیی دەیهڵێنەوە.

وێنە گەورەکە: ترەمپ لە نامەکەیدا بۆ ڕێبەری باڵای ئێران، کە لە ڕێگەی ئیماراتەوە ناردبووی، داوای دانوستانی کردبوو بۆ چارەسەری پرسی ئەتۆمیی ئەو وڵاتە. ئێران لە ڕێگەی عومانەوە وەڵامی نامەکەی داوەتەوە و بە دانوستانی ناڕاستەوخۆ ڕازی بووە.

ڕاگەیێنراوی فەرمی: وەزارەتی دەرەوەی ئێراندا لە ڕاگەیێنراوێکدا دەڵێت: پاراستنی نهێنیبوونی دانوستانەکان و نامەنووسینە نێودەوڵەتییەکان و بڵاونەکردنەوەی وردەکارییەکانی ئەم ئاراستە دیپلۆماسییە کارێکی پیشەییانە و لە بەرژەوەندیی گشتییە.

لە لایەکی دیکەوە: فاتیمە موهاجەرانی، گوتەبێژی حکومەتی ئێران، ڕایگەیاند دەستکردن بە دانوستانی ناڕاستەوخۆ لەگەڵ ئەمریکا خراوەتە بەرنامەی کارەوە و کاری لەسەر دەکرێت.