ئەنجوومەنی گەڕەکە کوردییەکانی حەلەب لەگەڵ دەسەڵاتدارانی سووریا ڕێکدەکەون

ئاڤا نیوز

ئەنجوومەنی هەردوو گەڕەکی شێخ مەقسود و ئەشرەفیەی شاری حەلەب کە زۆرینەی دانیشتووانەکەی کوردن لەگەڵ دەسەڵاتدارانی سووریا ڕێککەوتنیان واژۆکرد، بەگوێرەی ڕێککەوتنەکەش تایبەتمەندی کۆمەڵایەتی و کلتووری ئەو دوو گەڕەکە دەپارێزرێت و هەسەدەش تیایاندا دەکشێتەوە.

بۆچی گرنگە: بەگوێرەی ڕێککەوتنەکە تایبەتمەندی ئەمنیی، خزمەتگوزاریی، کارگێڕیی، کلتووریی و سیاسی گەڕەکە کوردییەکانی حەلەب دەپارێزرێت و هێزەکانی ئاسایشی کورد و بازگەکانیان دەمێننەوە، بەڵام هێزی سەربازیی هەسەدە لە گەڕەکەکان دەکشێتەوە.

ڕاگەیێنراوی فەرمی: میدیای ڕۆژئاوای کوردستان ناوەڕۆکی ڕێککەوتنەکەی بڵاوکردووەتەوە و گرنگترین خاڵەکانی ڕێککەوتنەکە بریتین لە:

- ڕێز لە تایبەتمەندی کۆمەڵایەتی و کلتووری دانیشتوانی ئەم دوو گەڕەکە دەگیرێت.

- وەزارەتی ناوخۆی سووریا بە هاوکاری هێزەکانی ئاسایش بەرپرسیارە لە پاراستنی دانیشتوانی ئەو دوو گەڕەکە.

- هێزە سەربازییەکان بە چەکەکانیانەوە بۆ ڕۆژهەڵاتی فورات دەکشێننەوە.

- بۆ ئاسانکاریی هاتووچۆکردن لەنێوان حەلەب و ناوچەکانی باکوور و ڕۆژهەڵاتی سووریا لیژنەیەکی هەماهەنگی پێکدەهێنرێت.

- ئەو دیلانەی هەردوولا کە دوای ئازادكردنی سووریا بە دیل گیراون، ئازاد دەکرێن.

- دانیشتووانی ئەو گەڕەکانە لە هەموو ئەنجوومەن و بوارەکانی حەلەب نوێنەرایەتییان دەبێت.

- دامەزراوە خزمەتگوزاری و کارگێڕی و پەروەردەیی و شارەوانییەکان دەمێننەوە تا ئەو کاتەی لیژنە ناوەندییەکان لەسەر چارەسەرێکی هەمیشەیی ڕێککەوتن واژۆ دەکەن.