چین مانۆڕی سەربازی بەرفراوان لە گەرووی تایوان دەستپێدەکات

ئاڤا نیوز

یەک ڕۆژ دوای ئەنجامدانی مەشقی سەربازی بۆ گەمارۆدانی ئەو دوورگەیەی کە پەکین خواستی لەسەرە، چین مانۆڕێکی سەربازیی بەرفراوانی نوێی لە گەرووی تایوان دەستپێکردووە، ئەمەش کاردانەوەی واشنتن و برۆکسلی بەدوا هات و سەرکۆنەی دەکەن.

بۆچی گرنگە: گەرووی تایوان کە هێڵێکی گەورەی کەشتیووانی دەریایی نێودەوڵەتییە، خاڵێکی سەرەکی گرژییە لە نێوان وڵاتە زلهێزەکان، بەتایبەتی چین و ئەمریکا.

چیرۆکی سەرەکی: ئەم مانۆڕە نوێیانە کە پێشتر ڕانەگەیێنرابوون، دوای چەند ڕۆژێک دێت کە پیت هێگسێتی، وەزیری بەرگری ئەمریکا لە گەشتێکیدا بۆ وڵاتانی ئاسیا، جەختی لەوە کردەوە  کە وڵاتەکەی پاراستنی  گەرووی تایوان مسۆگەر دەکات.

ڕاگەیێنراوی فەرمی: شی یی، گوتەبێژی فەرماندەیی کەرتی ڕۆژهەڵاتی سوپای چین ڕایگەیاند، ئەم مانۆڕە نوێیانە ئامانجیان تاقیکردنەوەی تواناکانی هێزەکانە لە ڕێکخستن و کۆنترۆڵکردنی ناوچەکان، سەپاندنی گەمارۆی هاوبەش و ئۆپەراسیۆنەکانی چاودێریکردن و دەستپێکردنی هێرشی ورد بۆ سەر ئامانجە سەرەکییەکان.

لەلایەکی دیکەوە: ئەمریکا هۆشداری دا لەوەی چین بە ئەنجامدانی مانۆڕی سەربازی لە گەرووی تایوان، ئاسایشی ناوچەکە دەخاتە مەترسییەوە.