نەتەوە یەکگرتووەکان چالاکییەکانی لە غەززە کەمدەکاتەوە

ئاڤا نیوز

ڕێکخراوی نەتەوە یەکگرتووەکان ڕایگەیاند، ئامادەیی و چالاکییەکانی خۆی لە کەرتی غەززە کەمتر دەکاتەوە.

ئەوەی پێویستە بیزانیت: ئەم بڕیارەی نەتەوە یەکگرتووەکان دوای ئەوە دێت کە سوپای ئیسرائیل هەشت پزیشکی فەلەستینی، شەش فریاگوزاری بەرگریی شارستانی و کارمەندێکی نەتەوە یەکگرتووەکانی لە باشووری غەززە دەستگیر کردن و هەموویانی کوشت و لە گۆڕێکی بەکۆمەڵدا ناشتنی. دواتر گۆڕە بە کۆمەڵەکە دۆزرایەوە و تەرمەکان دەرهێنران.

ئەمەش بزانە: پێشتریش ئاژانسی یونیسێفی سەر بە نەتەوە یەکگرتووەکان ڕایگەیاندبوو، ئیسرائیل تەنیا لە ماوەی 10 ڕۆژدا 322 منداڵی کوشتووە و زیاتر لە 600 منداڵیش بریندار بوون. بە گوتەی یونیسێف بە شێوەی تێکڕا ڕۆژانە نزیکەی 100 منداڵ دەکوژرێن و بریندار دەبن، واتە ئیسرائیل لە سەرەتای هێرشەکانەوە زیاتر لە 15 هەزار منداڵی کوشتووە.

زانیاریی زیاتر: ئیسرائیل لە 18ـی ئازارەوە کۆتایی بە ئاگربەست هێناوە و هێرشەکانی بۆ سەر کەرتی غەززە دەستپێکردوونەتەوە. لەو کاتەوە ئیسرائیل زیاتر لە هەزار کەسی لە کەرتی غەززە کوشتووە کە زۆربەیان ژن و منداڵن، بەمەش ژمارەی کوژارانی غەززە لە ئۆکتۆبەری 2023ـەوە 50 هەزار کەسی تێپەڕاندووە.