فەرەنسا: ئەوروپا باج بەسەر ئەمریکا دەسەپێنێت

 

ئاڤا نیوز

لە کۆتایی مانگی نیسان یەکێتی ئەوروپا وەڵامی ئەمریکا دەداتەوە، دوای ئەوەی بڕیارە ئەمریکا باجی زیادە بەسەر وڵاتانی ئەوروپادا بسەپێنێت.

وێنە گەورەکە: چاوەڕوان دەکرێت دۆناڵد ترەمپ سەرۆکی ئەمریکا ئەمڕۆ چوارشەممە باجی زیادە بەسەر ئەوروپا بسەپێنێت، پێشتر ترەمپ ڕایگەیاند، ئەمڕۆ ڕۆژی ئازادکردنی ئەمریکایە.

لێدوانی فەرمی: سۆفی بەریما وتەبێژی حکومەتی فەرەنسا ڕایگەیاند، پێش کۆتاییهاتنی مانگی نیسان یەکێتی ئەوروپا وەڵامی سەپاندنی باجی زیادە لەسەر بەرهەمی ئەوروپا لەلایەن ئەمریکاوە دەداتەوە.

بە دوو جۆر وەڵامی ئەمریکا دەدەینەوە، یەکەمیان لە ناوەڕاستی مانگی نیساندا دەبێت دژ بە سەپاندنی باج لەسەر بەرهەمی ئەلەمنیۆم و پۆڵای ئەوروپا لەلایەن ئەمریکاوە، دووەمیان یەکێتی ئەوروپا خوێندنەوەیەکی ورد بۆ هەموو کەرتەکانی پەیوەندیدار بە ئەمریکاوە دەکات، و دواتر لە کۆتایی مانگی نیسان یەکێتی ئەوروپا بڕیارێکی یەکگرتوو و بەهێزی ئەمریکا دەداتەوە.

لە لایەکی دیکەوە: ستیفن هێپسترێت، وتەبێژی حکومەتی ئەڵمانیا ڕایگەیاند، ئامادەن دانوستاندن لەگەڵ ئەمریکا بکەن و زیانەکانی شەڕی بازرگانی تەنیا لەسەر لایەنێک نابێت، بەڵکو هەریەک لە ئەمریکا و ئەوروپا زەرەرمەند دەبن.

ئەمەش بزانە: ئەمریکا و ئەوروپا گرنگترین هاوبەشی بازرگانی یەکترن، و تەنیا لە ساڵی 2024، بە بەهای 865 ملیار یۆرۆ کاڵایان ئاڵوگۆڕ کردووە.