سەرۆکوەزیرانی ئیسرائیل بەسەردانێک گەیشتە ھەنگاریا

ئاڤا نیوز

بنیامین نەتاتیاھۆ، سەرۆکوەزیرانی ئیسرائیل، بەسەردانێک بەرەو ھەنگاریا بەڕێکەوت، بەوەش سەرپێچی فەرمانی دەستگیرکردنەکەی کرد کە لەلایەن دادگای تاوانی نێودەوڵەتییەوە دەرکراوە.

بڵاوکراوە فەرمییەکان: میدیاکانی ئیسرائیل بڵاویان کردەوە، دوێنێ چوارشەممە بنیامین نەتانیاھو، سەرۆکوەزیرانی ئیسرائیل کە لەلایەن دادگای تاوانی نێودەوڵەتییەوە داواکراوە بەرەو ھەنگاریا بەڕێکەوتووە.

- ڕۆژنامەی "یسرائیل ھیۆم" بڵاویکردەوە، دوێنێ نەتانیاھو لە فڕۆکەخانەی بن گوریۆن لە تەل ئەبیب بەرەو ھەنگاریا بەڕێکەوتووە. سەردانەکەی سەرۆکوەزیرانی ئیسرائیل بۆ ھەنگاریا، چوار ڕۆژ دەخایەنێت.

- ڕۆژنامەی "یەدیعووت ئەحرەنووت" بڵاوی کردەوە: ھێشتا 59 بارمتەی ئیسرائیلی لە غەززە دەستبەسەرن، کەچی بنیامین نەتانیاھو سەردانی ھەنگاریا دەکات، بۆ ئەوەی پشووی کۆتایی ھەفتە لەسەر ڕووباری دانووب بەسەر ببات.

ئەوەی پێویستە بیزانیت: لەم چەند ڕۆژەی دواییدا، ژمارەیەک لەو ڕێکخراوانەی کە پاڵپشتی لە فەڵەستین دەکەن، فشاریان خستووەتە سەر ھەنگاریا بۆ ئەوەی فەرمانەکەی دادگای تاوانی نێودەوڵەتی بۆ دەستگیرکردنی بنیامین نەتانیاھو جێبەجێ بکات.

باکگراوند: لە 21ی نۆڤەمبەری 2024، دادگای تاوانی نێودەوڵەتی لە لاھای، بە تۆمەتی ئەنجامدانی تاوانەکانی جەنگ دژ بە مرۆڤایەتی لە غەززە فەرمانی دەستگیرکردنی بۆ سەرۆکوەزیرانی ئیسرائیل دەرکرد.