پەرلەمانی عێراق فرۆشتنی جگەرە و هاوشێوەکانی بە تەمەنی خوار 18 ساڵ قەدەغە دەکات

ئاڤا نیوز

سەرۆکی لیژنەی تەندروستی لە پەرلەمانی عێراق ڕایگەیاند، هەفتەی داهاتوو پەرلەمانی عێراق دەنگ لەسەر پڕۆژەیاسای ڕووبەڕووبوونەوەی جگەرە و هاوشێوەکانی دەدات و بەهۆیەوە فرۆشتنی جگەرە و هاوشێوەکانی بەکەسانی خوار 18 ساڵ قەدەغە کرێت.

چیرۆکی سەرەکی: بەمەبەستی دوورخستنەوەی کەسانی تەمەن خوار 18 ساڵ لە بەکارهێنان و فرۆشتنی جگەرە و هاوشێوەکانی و پاراستنی تەندروستییان، پەرلەمانی عێراق بە نیازە بڕیارێک بۆ ئەم مەبەستە دەربکات.

ئەوەی پێویستە بیزانیت: لە عێراق یاسای قەدەغەی جگەرە کێشان لە شوێنە گشتییەکان لە ساڵی 2012ـەوە دەرچووە، بەڵام یاساکە پەکخراوە و کاری پێناکرێت، ئەوەش نیشانەی پرسیار لەسەر ئاستی جێبەجێکردنی یاساکان وەک خۆی لە عێراق دروستدەکات.

لێدوانی فەرمی: ماجید شنگالی، سەرۆکی لیژنەی تەندروستی لە پەرلەمانی عێراق بۆ میدیای فەرمی عێراق وتی:

ڕەشنووسی کۆتایی پڕۆژەیاسای ڕووبەڕووبوونەوەی جگەرە و ڤەیب و هاوشێوەکانی لە قۆناغی کۆتاییدایە و هەفتەی داهاتوو دەنگی لەسەر دەدرێت.

بەگوێرەی پڕۆژەکە هەر دوکان و لایەنێک جگەرە و هاوشێوەکانی بەکەسانی خوار 18 ساڵ بفرۆشێت، باج و سزای بەسەردا دەسەپێنرێت.

پەککەوتنی دانیشتنەکانی پەرلەمان بۆ ماوەی حەوت مانگ، هۆکار بووە بۆ ئەوەی کە نەتوانین زۆر یاسای گرنگ پەسەند بکەین.

ئەمەش بزانە: بەگوێرەی ڕەشنووسی یاساکە سزاکان بەمجۆرە دەبن:

٠ جگەرە کێشان لە شوێنە گشتییەکان 50 هەزار دینار پێبژاردن.

٠ فرۆشتنی جگەرە بە کەسانی خوار 18 ساڵ؛ شەش مانگ زیندانیکردن یان 250 هەزار بۆ 500 هەزار دینار پێبژاردنی دارایی.