قۆناغی چوارەمی ڕێگای هەولێر - کۆیە دەستپێدەکات

 

ئاڤا نیوز

کارکردن لە پڕۆژەی جووتسایدی هەولێر - کۆیە بەردەوامە، پارێزگاری هەولێریش لەوبارەیەوە دەڵێت 'دەست بە قۆناغی چوارەمی ڕێگاکە کراوە'.

وێنەگەورەکە: ڕێگای هەولێر – کۆیە ناوەندێکی گرنگ و ستراتیژییە لە نێوان هەردوو پارێزگای هەولێر و سلێمانی، بڕیار بوو ساڵی 2014 تەواو بکرێت، بەڵام چەند ساڵێکە بە هۆکاری جیاواز کاری تێدا نەکراوە، لە کابینەی نۆیەم بڕیاری تەواوکردنی درا و ئێستا کارکردن تێیدا بەردەوامە.

بڵاوکراوەی فەرمی: ئومێد خۆشناو، پارێزگاری هەولێر لە پەڕەی تایبەتی لە تۆڕی کۆمەڵایەتی فەیسبووک، نووسیویەتی، بە بڕیاری سەرۆکوەزیران مەسرور بارزانی کارکردن لە جووتسایدی هەولێر - کۆیە دەستیپێکردەوە، هەروەها کارەکانی پڕۆژەکەش زۆر بەخێرایی بەڕێوەدەچن.

زانیاریی زیاتر: سێ قۆناغی پڕۆژەکە تەواو بووە، ئێستا بە بڕیاری سەرۆکوەزیران مەسرور بارزانی بڕی 560 ملیار دینار بۆ قۆناغی چوارەمی پڕۆژەکە تەرخان کراوە.

ئەوەی پێویستە بیزانیت: ڕۆژانە زیاتر لە 100 ئامێری جۆراو جۆر لەگەڵ ستافی ئەندازیاری بۆ ماوەی هەشت تا 10 کاتژمێر کار لە پڕۆژەکەدا دەکەن.

بۆچی گرنگە: جووتسایدی هەولێر - کۆیە جگە لەوەی ڕێگایەکی ستراتیژیی دەبێت، هاوکات ئاسانکاری زۆر بۆ هاتووچۆی هاونیشتمانیان لەنێوان شارەکانی هەولێر و سلێمانی دەکات.