ئاسایشی هەولێر: کەسێک بەمەبەست کۆگاکەی هەولێری سووتاندووە

ئاڤا نیوز

ئاسایشی هەولێر ئاشکرای دەکات تۆمەتبارێک بەمەبەست کۆگاکەی ناوچەی پیشەسازیی باکووری هەولێر سووتاندووە و دەستگیر کراوە. 

 

ڕاگەیێنراوی فەرمی: بەڕێوەبەرایەتیی ئاسایشی هەولێر ڕایگەیاند: دوای ڕووداوی سووتانی کۆگاکەی ناوچەی پیشەسازیی هەولێر، لەلایەن تیمەکانمانەوە دەست بە لێکۆڵینەوە کرا و لە لێکۆڵینەوەکان دەرکەوت هۆکاری سووتانی ئەم کۆگایە شۆرتی کارەبا نەبووە، بەڵکو بەمەبەست کەسێک ئەم تاوانەی کردووە.

 

زانیاریی زیاتر: دوای بەدواداچوونی ورد و زیاتری تیمەکانی ئاسایش توانرا ناسنامەی ئەوکەسە ئاشکرا بکرێت کە هەڵساوە بە سووتاندنی ئەم کۆگایە، پاشان بە بڕیاری دادوەری لێکۆڵینەوەی ئاسایشی هەولێر تۆمەتبار (ف. ح. ع)ـمان دەستگیر کرد، تۆمەتباری ناوهاتوو لە لێکۆڵینەوەکان دانی بە تاوانەکەیدا ناوە.

 

باکگراوند: ڕۆژی شەممە، ڕێککەوتی 09-03-2024 ئاگرێک لە کۆگایەک لە ناوچەی پیشەسازیی باکووری شاری هەولێر کەوتەوە و بووە هۆی زەرەر و زیانێکی زۆری ماددی و سووتانی تەواوی کۆگاکە.