ئاڤا کێشەی جووتیارانی سێبیران بە وەزارەتی کارەبا دەگەیەنێت

 

ئاڤا نیوز

دوای بڕیارەکەی وەزارەتی کارەبا بۆ چاکسازی لە کێڵگەی غازی کۆرۆمۆر، جووتیارانی سنووری کۆمەڵگەی سێبیران کێشەی کەمی کارەبایان بۆ دروست بووە، وەزارەتی کارەباش دەڵێت 'ڕەچاوی بارودۆخیان دەکەین'.

چیرۆکی سەرەکی: جووتیارانی بەرانەتی لەسنووری کۆمەڵگەی سێبیران لە هەولێر، وەک خۆیان دەڵێن بەهۆی کەمی ڕێژەی بارانبارینەوە، ئەمساڵ زەوییەکانیان بەراو کردووە، بۆ ئاودانی دانەوێڵەکانیان پشت بە کارەبای نیشتمانی دەبەستن، بەڵام دوای بڕیارەکەی وەزارەتی کارەبا بۆ نۆژەنکردنەوەی کێڵگەی غازی کۆرۆمۆر، لە شەو و ڕۆژێکدا تەنیا یەک کاتژمێر کارەبایان پێدراوە، داوا دەکەن سێ تا پێنج کاتژمێر کارەبایان بۆ زیاد بکرێت بۆ ئەوەی دانەوێڵەکانیان نەفەوتێت.

لێدوانی فەرمی: ئومێد ئەحمەد، وتەبێژی وەزارەتی کارەبا لەبارەی ئەم بابەتەوە بە ئاڤا میدیای ڕاگەیاند: لەگەڵ بەڕێوەبەرایەتی گشتیی کارەبای هەولێر قسەم کرد، بەڵێنی دا کە بە هیچ شێوەیەک گرفت بۆ ئەو جووتیارانە دروست نەبێت، هەروەها ڕەچاوی بارودۆخیان دەکرێت.