بانکی ناوەندی ئەمریکا: سەپاندنی باج هەڵئاوسان زیاد دەکات

 

ئاڤا نیوز

بانکی ناوەندی ئەمریکا نیگەرانە لە هەنگاوەکانی ترەمپ و بە مەترسی بۆسەر ئابووری ئەمریکا ناوزەندی دەکات، سەرۆکی ئەمریکاش داوایان لێدەکات ڕێژەی سوود کەمبکەنەوە.

وێنە گەورەکە: ڕێوشوێنە بازرگانییەکانی ترەمپ کە سەرەتای ئەم هەفتەیە ڕاگەیەندرا، بانکی ناوەندی ئەمریکای نیگەران کردووە و دەڵێن، نرخی پێداویستییەکان بەرزدەکاتەوە و ڕێژەی بێکاری لە ئەمریکا زیاد دەکات.

لێدوانی فەرمی: جیرۆم پاول، سەرۆکی بانکی ناوەندی ئەمریکا ڕایگەیاند، سەپاندنی باج لەلایەن دۆناڵد ترەمپ، سەرۆکی ئەمریکا ڕێژەی بێکاری زیاد دەکات و پێدەچێت ببێتە هۆی بەرزبوونەوەی هەڵاوسان و خاوبوونەوەی گەشەسەندنی ئەمریکا.

زانیاریی زیاتر: پێش قسەکانی جیرۆم پاول، ترەمپ داوای لێکرد دەستبەجێ ڕێژەی سوود کەمبکاتەوە و تۆمەتباریشی کرد بەوەی لە بەڕێوەبردنی بانکی ناوەندی ئەمریکادا سیاسییانە مامەڵە دەکات.

باکگراوند: ڕۆژی 2025-04-03، دۆناڵد ترەمپ، سەرۆکی ئەمریکا ڕایگەیاند، بە ڕێژەی 25% باجی زیاتر بەسەر ئۆتۆمبێلی هاوردەکراوی وڵاتانی جیهان دەسەپێنن و هەلی کار و ژمارەی کارگەکان لە ئەمریکا زیاد دەکەن بەجۆرێک بەتەواوی پشت بە خۆیان دەبەستن.