ترەمپ هەلێکی دیکە بە تیکتۆک دەبەخشێت

 

ئاڤا نیوز

وادەیەکی دیکە بەخشرایە تیکتۆک تاوەکو پشکەکانی بە کڕیارە ئەمریکییەکان بفرۆشێت، ترەمپیش دەڵێت، بەسەختی کاردەکەن تاوەکو تیکتۆک لە ئەمریکا قەدەغەنەکرێت و کڕیارێکی بۆ پەیدا بکەن.

وێنە گەورەکە: تۆری کۆمەڵایەتی تیکتۆک لەسەر ئاستی جیهان بەکارهێنەرێکی زۆری هەیە و تەنیا لە ئەمریکا زیاتر لە 170 ملیۆن بەکارهێنەری هەیە، لە ژێر هەڕەشەی یاسایەکی ئەمریکادایە کە ساڵی ڕابردوو بە زۆرینەی دەنگی ئەندامانی کۆنگرێسی ئەمریکا پەسەندکرا، یاساکە داوا لە کۆمپانیای بایتدانسی چینی خاوەندارێتی تیکتۆک دەکات یان پشکەکانی بە ئەمریکا بفرۆشێت یان ئەپلیکەیشنەکە لە وڵاتەکە قەدەغەدەکرێت.

لێدوانی فەرمی: دۆناڵد ترەمپ، سەرۆکی ئەمریکا ڕایگەیاند، نایانەوێت تیکتۆک لە ئەمریکا قەدەغە بکەن و بە سەختی کاردەکەن بۆ ئەوەی لەگەڵ کۆمپانیای خاوەندارێتی ئەپڵیکەیشنەکە بگەنە ڕێککەوتن.

ئەوەی پێویستە بیزانیت: ترەمپ 75 ڕۆژی دیکەی وەک دەرفەتێک داوەتە کۆمپانیای بایتدانسی چینی بۆئەوەی پشکەکانی تیکتۆک بە کۆمپانیا ئەمریکییەکان بفرۆشێت.