لە عێراق "95 ترلیۆن دینار" لە دەرەوەی سیستمی بانکییە

ئاڤا نیوز

ڕاوێژکارێکی حکومەتی عێراق دەڵێت، لە کۆی 109 ترلیۆن دینار پارە کە لای حکومەت و دامەزراوەکان و هاووڵاتیانە، 95 ترلیۆن دیناری لە دەرەوەی سیستمی بانکییە، جەختیش دەکاتەوە کە ئامانجی حکومەت لە برەودان بە مامەڵە و پارەدانی ئەلیکترۆنی بۆ ئەوەیە ئەو پارەیە ببێتە بەشێک لە بەهێزکردنی ئابووری نیشتیمانیی.

وێنە گەورەکە: سەرەڕای دڵنیاییەکانی حکومەت و بانکی ناوەندی، بەڵام تائێستاش بەشێک لە هاووڵاتیان و دامەزراوەکان پێیان باشترە پارەکانیان لە ناو قاسەی ماڵەکانیان دابنێن نەک بیبەن بۆ بانک، ئەویش بەهۆکاری ئەوەی متمانەیان بە سیستمی بانکی عێراق نییە و مەترسییان هەیە لەکاتی پێویستیدا پارەکانیان بۆ نەگەڕێنرێتەوە.

لێدوانی فەرمی: مەزهەر محەممەد ساڵح، ڕاوێژکاری ئابووری سەرۆکوەزیرانی عێراق بۆ ئاژانسی هەواڵی فەرمی عێراق ڕایگەیاند:

٠ هەنگاوەکانی حکومەت و بانکی ناوەندی بۆ پەرەپێدانی بازرگانی ئەلیکترۆنی و پارەدان بەشێوەی دیجیتاڵی بۆ ئەوەیە کۆی ئەو پارەیەی لە وڵاتدا هەیە پێکەوە ببێتە بەشێک لە ئارامی دارایی، حکومەتیش ئاسانکاریی و ڕێنمایی بۆ ئەم کەرتە دەرکردووە.

٠ پارەدانان لە ماڵ لەجێگەی دانانی لە بانک، ئاستەنگییەکی گەورەیە لەبەردەم ئابووری عێراق، بەجۆرێک مەزەندە دەکرێت 87%ـی ئەو پارەیەی بەشێوەی کاش لە وڵاتدا هەیە لەدەرەوەی سیستمی بانکیی بێت، ئەم پارەیەش بە 95 ترلیۆن دینار خەمڵێنراوە لە کۆی 109 ترلیۆن دینار.

٠ هەرچەندێک پارەدان و بازرگانی بەشێوەی ئەلیکترۆنی هەبێت، ئەوەندە پارە لە بانک زیاتر دەبێت و بەهۆیەوە بانکە مۆڵەت پێدراوەکان دەتوانن قەرز و خزمەتگوزاریی زیاتر پێشکەش بە هاووڵاتیان بکەن.

٠ بازرگانیی و جوڵەی پارە لەدەرەوەی سیستمی بانکی مەترسیدارە و تێچووی لەسەر هاووڵاتیان زۆرە، بەشێک لە چالاکییەکانی ئەم جۆرە مامەڵەیەش بەهۆی ئەوەی ڕوون نین، دەبنە پێشێلکردنی یاسای ڕووبەڕووبوونەوەی سپیکردنەوەی پارە.