زێلێنسکی: پێشوازی لە جێگیرکردنی هێزەکانی ئەوروپا لە ئۆکراینا دەکەین

 

ئاڤا نیوز

دوای سەردانی سەرۆک ئەرکانی سووپای فەرەنسا و بەریتانیا بۆ کیێڤ، سەرۆکی ئۆکراینا پێشوازی لە پێشنیازی جێگیرکردنی هێزێکی ئەوروپی لە سەر خاکی وڵاتەکەی دەکات لە ئەگەری گەیشتن بە ئاگربەست لەگەڵ ڕووسیا.

وێنە گەورەکە: فەرەنسا و بەریتانیا پێشنیازی ڕەوانەکردنی هێزێکی ئەوروپی بۆ ئۆکراینا دەکەن، بۆ دڵنیابوون لەوەی کە جەنگی نێوان ڕووسیا و ئۆکراینا لە دوای ڕاگەیاندنی ئاگربەست دەستپێناکاتەوە.

لێدوانی فەرمی: ڤۆلۆدیمێر زێلینسکی، سەرۆکی ئۆکراینا ڕایگەیاند، پێشکەوتنی بەرجەستە و وردەکاری سەرەتایی لەسەر چۆنیەتی جێگیرکردنی هێزێکی ئەمنی هاوبەشی ئەوروپا لە ئۆکراینا هەیە.

لە لایەکی دیکەوە: ئیمانوێل ماکرۆن، سەرۆککۆماری فەرەنسا ڕایگەیاند، لە گفتوگۆکانیان سەبارەت بە پشتیوانی درێژخایەن بۆ گەلی ئۆکراینا بەردەوامن.

ئاماژەی بەوەشکردووە، بە پلەی یەکەم پشتیوانی لە سوپای ئۆکراینا دەکەن کە هێڵی بەرگری یەکەمە و هەرواش دەمێنێتەوە، دووەمیش بۆ هێزێکی ئەوروپی کە لە پشت هێڵی ئۆکراینا جێگیر بکرێن بۆ ڕێگریکردن لە هەر دەستدرێژییەکی نوێی ڕووسیا.