پێدانی قەرز بۆ كارەبای وزەی خۆر دەستپێدەکات

ئاڤا نیوز

بانکی ڕەشید، پێدانی قەرزی کڕینی یەکەی بەرهەمهێنانی کارەبا لە وزەی خۆری ڕاگەیاند، هاوکات وردەکاری پێدانی قەرزەکە بە ڕێژەی سوودی لە 5% دیاریکردوە.

وێنە گەورەکە: بەرهەمهێنانی کارەبا لەڕێگەی وزەی خۆر وەک یەکێک لە سەرچاوە گرنگەکانی دابینکردنی کارەبا دادەنرێت لەسەر ئاستی جیهان، حکومەتی عێراق دەیەوێت لەڕێگەی پێدانی قەرزی بانکی خەڵک هانبدات و فشار لەسەر تۆڕی کارەبا کەمبکاتەوە.

ئەوەی پێویستە بیزانیت: هاونیشتمانیان لە سەرجەم پارێزگاکانی عێراق بە هەرێمی کوردستانیشەوە، دەتوانن بۆ دانانی سیستمی کارەبای وزەی خۆر قەرز لە بانکەکان وەربگرن. بۆ ئەم مەبەستەش بڕی یەک ترلیۆن دینار بۆ ئەو پڕۆژەیە دیاری کراوە.

ڕاگەیێنراوی فەرمی: بەگوێرەی ڕاگەیێنراوی بانکی ڕەشید، بە پشتبەستن بە ڕێنماییەکانی محەممەد شیاع  سوودانی، سەرۆکوەزیرانی عێراق، وەزارەتی دارایی و بانکی ڕەشید ڕێنماییەکانی پێدانی قەرزی کڕین بۆ  یەکەکانی بەرهەمهێنانی کارەبا لە وزەی نوێبووەوە ڕادەگەیەنێت و جەختیش دەکاتەوە کە قەرزەکە بە سەرجەم هاووڵاتیان و فەرمانبەران دەدرێت.

شێوازی جێبەجێکردن: لە ڕێنمایی پێدانی قەرزدا بڕی قەرزەکە دیاریکراوە، کە (5 تا 20) ملیۆن دیناری عێراقییەوە بۆ ماوەی (5) ساڵ و بە ڕێژەی سوودی (5%) دەبێت.

زانیاریی زیاتر: بڕی قەرزەکە بەو فەرمانبەرانە دەدرێت کە ماستەرکاردی بانکەکەیان هەیەو پێویستە هاووڵاتیان کەفیلێک دەستەبەر بکەن کە مووچەکەی لە بانکی ڕەشید بێت، بانکی ڕەشید داواش لە سەرجەم ئەو کەسانە دەکات کە دەیانەوێت داواکاری پێشکەش بکەن سەردانی لقی بانکەکە بکەن لە بەغدا و پارێزگاکان.