پێنج ئەندامی نوێ بۆ سەرکردایەتیی یەکێتی زیاد دەکرێت

ئاڤا نیوز 

 

دوو ڕۆژە کۆبوونەوەی مەکتەبی سیاسیی یەکێتی نیشتمانی بەردەوامە و هاوکات بڕیار لەسەر چەند گۆڕانکارییەکی ناوخۆیی دراوە، ئەندامێکی سەرکردایەتیی ئەو حیزبەش باس لەوە دەکات ئەمڕۆ بڕیار لەسەر چەند گۆڕانکارییەکی دیکە دەدرێت. 

 

وێنە گەورەکە: ماوەی دوو ڕۆژە کۆبوونەوەی مەکتەب سیاسیی یەکێتی نیشتمانی کوردستان لە شاری سلێمانی بەردەوامە، ئامانج لەو کۆبوونەوەیەش بڕیاردانە لەسەر چەند گۆڕانکارییەکی ناوخۆی لەو حیزبە و دووبارە ڕێکخستنەوەی ئیدارەدانە. 

 

زانیاریی تایبەت: ئەندامێکی سەرکردایەتی یەکێتی نیشتمانی کوردستان، بە ئاڤا میدیای ڕاگەیاند: لە کۆبوونەوەی مەکتەبی سیاسیی کە ڕۆژی 6-4-2025 بەڕێوەچوو، ڕەفعەت عەبدوڵڵا، بە جێگری سەرۆکی یەکێتی دیار کرا، هەروەها دەسەڵاتی تەواوی بۆ کاروبارەکانی ناوخۆ و دەرەوەی حیزب دەبێت.

 

-  10 ئەندامی سەرکردایەتیی حیزبەکە لادەبرێن، هەروەها بافڵ تاڵەبانی خۆی پێنج ئەندامی سەرکردایەتیی نوێی دیار کردووە، کۆی گشتیی ئەندامانی سەرکردایەتی لە 60 ئەندامەوە دەبێت بە 55 ئەندام.

- ئەمڕۆ بڕیار لەسەر گۆڕینی بەرپرسی مەکتەب و مەڵبەندەکان دەدرێت، سەرەڕای ئەوەش گفتوگۆ لەبارەی لابردنی مەکتەبی شەهیدان و ڕێکخراوەکان و دروستکردنی مەکتەبی چاودێری وەک بەهێزترین مەکتەبی حیزبی دەدرێت.

لەلایەکی دیکەوە: ئەندامێکی مەکتەبی سیاسیی یەکێتی، شەوی یەکشەممە بۆ ئاڤا میدیای ڕایگەیاند: لە کۆبوونەوەی مەکتەبی سیاسیی یەکێتی ڕەفعەت عەبدوڵڵا، بە جێگری سەرۆک بافڵ دیار کراوە، بەڵام هێشتا بڕیارەکە نەکراوە بە نووسراو و بۆ ئەوەی بەشێوەیەکی فەرمی ڕابگەیەندرێت.

ئەوەی پێویستە بیزانیت: ڕۆژی 11-3-2025، ئاڤا وەک یەکەمین میدیای کوردستان، گۆڕانکارییە نێوخۆییەکانی یەکێتی نیشتمانی و دیارکردنی ڕەفعەت عەبدوڵڵای وەک جێگری بافڵ تاڵەبانی ئاشکرا کرد.