زیاتر لە 14 هەزار خێزانی چەکدارانی داعش لە سووریاوە گەڕێنراونەتەوە عێراق

ئاڤا نیوز

وەزارەتی کۆچ و كۆچبه‌رانی عێراق ڕایدەگەیێنێت، زیاتر لە 14 هەزار کەس لە ژن و منداڵی چەکدارانی داعش لە ماوەی چوار ساڵی ڕابردوو لە کەمپی هۆلەوە گواستراونەتەوە عێراق و پرۆسەکەش بەردەوامە.

چیرۆکی سەرەکی: بەگوێرەی هەردوو ئاماری ساڵی ڕابردووی ئیدارەی کەمپی هۆل و وەزارەتی کۆچ و کۆچبەرانی عێراق، لەکۆی 43 هەزار چەکدار و ژن و منداڵی ئەندامانی داعشی لەو کەمپە، 18 هەزارییان عێراقین، بەغداش جەخت لە گەڕانەوەی سەرجەمیان دەکاتەوە.

لێدوانی فەرمی: عەلی عەباس، وتەبێژی وەزارەتی کۆچ و كۆچبه‌ران بە ئاژانسی هەواڵی عێراقی ڕاگەیاند: کۆی ئەو خێزانانەی لە کەمپی هۆلەوە گەڕێنراونەتەوە و لە سەرەتای پرۆسەی گواستنەوەکە کە لە ساڵی 2021ـەوە دەستیپێکردووە تا ئەمڕۆ گەیشتووەتە سێ هەزار و 751 خێزان کە دەکاتە 14 هەزار و 513 کەس.

- سەبارەت بە ژمارەی ئەو خێزانانەی ئێستا لە ناوەندەکانی شیاندنەوە نیشتەجێکراون، عەلی عەباس دەڵێت: ژمارەیان نزیکەی 1200 خێزانە، کە دەکاتە چوار هەزار و 700 کەس. پرۆسەی گەڕانەوەی ئەو خێزانانەش دوای چوار بۆ شەش مانگ بەپێی مەرجە تایبەتەکان، دەگەڕێنرێنەوە ناوچەکانی خۆیان.

بە تەنیشت ئەم بابەتەوە: ڕۆژی دووشەممە سەرۆکوەزیرانی عێراق لە میانی پێشوازیکردنی لە خاتوو کریستین بورگنەر، بەربژێری سویسری بۆ پۆستی کۆمسیاری باڵای پەنابەرانی نەتەوە یەکگرتووەکان، جەختی لەسەر گرنگی گەڕانەوەی ئاوارەکانی عێراق لە کەمپی هۆل کردووە و ئاماژەی بەوەدا، پێویستە هەموو وڵاتان کار بۆ گەڕاندنەوەی هاووڵاتییانیان لە کەمپەکە بکەن و ڕاشیگەیاند، عێراق زۆر نزیکە لە کۆتاییهێنان بە داخستنی کەمپی ئاوارەکان.