ئەنجوومەنی سەرکردایەتی یەکێتی بڕیارەکانی مەکتەبی سیاسیی جێگیر دەکات

ئاڤا نیوز

بڕیارە ئەنجوومەنی سەرکردایەتی یەکێتی لەبارەی ئەو بڕیارانەی مەکتەبی سیاسیی کۆببێتەوە کە بۆ گۆڕانکاری ناوخۆیی دراوە.

وێنە گەورەکە: ڕۆژی 6 و 7-4-2025 کۆبوونەوەی مەکتەبی سیاسیی یەکێتی لە سلێمانی بەڕێوەچوو، ڕەفعەت عەبدوڵڵا، بە جێگری سەرۆکی یەکێتی دیاری کرا و دەسەڵاتی تەواوی بۆ کاروبارەکانی ناوخۆ و دەرەوەی حیزب پێدرا.

زانیاریی تایبەت: ئەندامێکی پێشووی مەکتەبی سیاسیی یەکێتی، بە ئاڤا میدیای گوت: پڕۆژەی یەکخستنەوە و ڕێکخستنی مەکتەب و مەڵبەندەکان کۆنە و هی 15 ساڵ پێش ئێستایە، ئەو کاتە بەنیازبووین لە هەولێر، سلێمانی، دهۆک مەڵبەندی شار و ناو شار دابنێین، یەک جار تاقیکرایەوە و دواتر لابرا، دیارە ئێستە ئەمە زیندوو دەکرێتەوە.

لێدوانی فەرمی: ئەندامێکی ئەنجوومەنی سەرکردایەتی یەکێتی، بە ئاڤا میدیای ڕاگەیاند: ئەوەی دەقیقە و یەکلایی کراوەتەوە، گۆڕینی بەشێک لە بەرپرسی مەڵبەند و مەکتەبەکانە، هەروەها لەسەر ئاستی پارێزگا و ئیدارە سەربەخۆکان مەڵبەندەکان ڕێکدەخرێتەوە، بەنموونە لە سلێمانی مەڵبەندی ناو شار و لە دەوروبەریش مەڵبەند لە چەمچەماڵ دادەنرێت، هەروەها مەڵبەندی ناوەند لە هەولێر و مەڵبەندی ڕۆژهەڵاتیش لە کۆیە دادەنرێت.

- ئەو بڕیارانەی لە مەکتەبی سیاسیی دراون دەبێت لە ئەنجوومەنی سەرکردایەتی جێگیر بکرێن، لەم ڕۆژانەش کۆبوونەوەی سەرکردایەتی لەوبارەیەوە دەکرێت.

زانیاریی زیاتر: بڕیارە ئەمڕۆ 9-4-2025، بافڵ تاڵەبانی، سەرۆکی یەکێتی نیشتمانی کوردستان سەردانی بەغدا بکات، هەروەها ژمارەیەک کۆبوونەوە لەگەڵ بەرپرسانی عێراق ئەنجام دەدات.