ترەمپ: ئەگەر پێویست بە کردەی سەربازی لە دژی ئێران بکات لەگەڵ ئیسرائیل ئەنجامی دەدەین

ئاڤا نیوز

دۆناڵد ترەمپ پێیوایە ئەگەر هەست بکات گفتوگۆکان لەگەڵ ئێران بە باشی بەڕێوەناچن، ئەوا ئێران دەبێت دڵنیا بێت کە کۆتاییەتی.

وێنە گەورەکە: دانوستانە ناڕاستەوخۆکەی نێوان ئەمریکا و ئێران نزیکە و تەنها ڕۆژێکی ماوە، هەموو جیهان و میدیا جیهانییەکان چاویان لەسەر رۆژی شەممەیە کە بزانن دانوستانەکان ئەنجامیان چۆن دەبێت، دۆناڵد ترەمپ دەڵێت بە نەبوونی ئەنجامی دانوستانەکان ئەوا بەدەر لە هێرشکردنە سەر ئێران بژاردەی دیکەمان نییە.

ڕاگەیێنراوی فەرمی:  دۆناڵد ترەمپ، سەرۆکی ئەمریکا لە ڕاگەیێنراویکدا ڕایگەیاند:

٠ ئەگەر دانوستانەکان لەگەڵ ئێران بێ ئەنجام بێت، ئەوا ئەمریکا هەڵوێستی سەربازی دەگرێتەبەر و ئیسرائیلیش بەشداری دەکات.

٠ سەبارەت بە ئەگەری کۆتاییهاتنی، ناتوانم کاتێکی دیاریکراو دیاری بکەم، بەڵام کاتێک دانوستانەکان دەست پێدەکەن زۆر بەخێرایی ڕوون دەبێتەوە کە ئایا پڕۆسەکە بەباشی بەڕێوەدەچێت یان نا، ئەگەر هەست بکەم ڕێچکەی گفتوگۆکان بەرەو باشی ناڕوات ئەوا کاتی کۆتایی هاتنی ئێرانە.

زانیاریی زیاتر: دانوستانەکانی نێوان ئێران و ئەمریکا بڕیارە ڕۆژی شەممە لە شانشینی عومان بەڕێوەبچێت. سەرەتای ئەم هەفتەیە، ترەمپ گوتی وتووێژەکان ڕاستەوخۆ دەبن و بەرپرسانی ئێرانیش بە ناڕاستەوخۆ وەسفیان کرد.