پێنج هەزار خێزانی شنگال قەرەبوو دەکرێنەوە

ئاڤا نیوز

حکومەتی عێراق پرۆژەیەک بۆ قەرەبووکردنەوەی قوربانییانی دەستی داعش لە شنگال ئامادە دەکات، لە قۆناغی یەکەمدا پێنج هەزار خێزان قەرەبوو دەکرێنەوە و بڕی 40 ملیار دیناری بۆ تەرخان دەکرێت.

چیرۆکی سەرەکی: دوای نزیکەی 10 ساڵ تێپەڕبوون بەسەر هێرشی داعش بۆ شنگال و دەوروبەری کە تاوەکو ئێستا 80%ی وێرانە، حکومەتی عێراق لیژنەیەکی بۆ قەرەبووکردنەوەی قوربانیانی دەستی ڕێکخراوەکە پێکهێناوە و ئێستا سەرقاڵی ئامادەکردنی ڕەشنووی پرۆژەیەکن.

لێدوانی فەرمی: عەیدان کالۆ، ئەندامی ئەنجوومەنی پارێزگای نەینەوا و ئەندامی لیژنەی قەرەبووکردنەوە بە ئاڤا نیوزی گوت، لە ماوەیەکی نزیکدا پرۆژەکە تەواو دەبێت و پێشکەشی ئەنجوومەنی وەزیران دەکرێت.

زانیاریی زیاتر: قەرەبووکردنەوە بە قۆناغ دەبێت، لە قۆناغی یەکەمدا  پێنج هەزار خێزان قەرەبوودەکرێنەوە و بڕی 40 ملیار دیناری عێراقی بۆ تەرخانکراوە.

بۆچی گرنگە: پرۆژەکە هاوکار دەبێت بۆ ئاوەدانکردنەوەی شنگال، قەرەبووکردنەوەی کەسوکاری قوربانییان و گەڕانەوەی ئاوارەکان لە مانگی تەمموزی ئەمساڵدا.

باکگراوند: چواری ئەم مانگە محەممەد شیاع سوودانی بۆ یەکەمجار سەردانی شنگالی کرد و چەند بڕیار و پرۆژەیەکی ڕاگەیاند، دیارترینیان تەرخانکردنی بڕی 50 ملیار دینار بوو بۆ ئاوەدانکردنەوە قەزاکە، بڕیاری قەرەبووکردنەوەش لە چوارچێوەی بەڵێنەکانی سوودانی دایە.