بەرگریی شارستانی: ئاوەکانی هەرێمی کوردستان بۆ مەلەوانی شیاو نین

ئاڤا نیوز

 

گوتەبێژی بەرگریی شارستانی هەولێر ڕایدەگەیێنێ، ئاوەکانی هەرێمی کوردستان بۆ مەلەوانی شیاو نین. هاوکات لەسەرەتای ئەمساڵەوە تائێستا تەنیا لە پارێزگای هەولێر پێنج کەس لە ئاودا خنکاون

 

چیرۆکی سەرەکی: ساڵانە لە هەردوو وەرزی بەهار و هاوین، چەندین ڕووداوی خنکان لە زێ و ڕووبار و ڕووبەرە ئاوییەکانی هەرێمی کوردستان ڕوودەدەن، بەرگریی شارستانیی هەرێمی کوردستانیش دووپاتی دەکاتەوە، ئاوەکانی هەرێمی کوردستان بۆ مەلەوانی شیاو نین، تەنیا ئەو شوێنە گەشتیاراییانە نەبێت کە مۆڵەتی فەرمیان هەیە.

 

لێدوانی فەرمی: موقەدەم شاخەوان سەعید، گوتەبێژی بەرگریی شارستانیی هەولێر بە ئاڤا میدیای گوت: ئەمساڵ پێنج کەس لە ئاودا خنکاون، سێ ئافرەت و دوو پیاو، تەرمی هەر پێنج کەسیان لەلایەن تیمەکانی ژێرئاوی سەر بە بەڕێوەبەرایەتیی بەرگریی شارستانیی هەولێر دۆزراونەتەوە و ڕادەستی کەسوکاریان کراونەتەوە.

 

لەلایەکی دیکە: موقەدەم سەرکەوت کاڕەش، گوتەبێژی بەرگریی شارستانیی هەرێمی کوردستان گوتی، سروشتی ئاوەکانی هەرێمی کوردستان بۆ مەلەوانی شیاو نین، لەبەر ئەوەی ئاوەکان تیژڕەون، ئاوەکەیان ساردە، قولایی و تەنکاییان دیار نییە.

 

ژمارەکان وادەڵێن: ساڵی ڕابردوو 94 کەس لە هەرێمی کوردستان لە ئاودا خنکاون، بەشی زۆریان تەمەنیان لە نیوان 15 بۆ 25 ساڵی بووە.