سەرۆکی ڕووسیا و بەرپرسانی ئەمریکا کۆدەبنەوە

ئاڤا نیوز

ڤلادیمێر پووتین، سەرۆکی ڕووسیا لەگەڵ ستیڤ ویتکۆف، نوێنەری تایبەتی سەرۆکی ئەمریکا بۆ ڕۆژهەڵاتی ناوەڕاست لەسەر پرسی ئاگربەست لەگەڵ ئۆکراینا کۆدەبێتەوە.

وێنە گەورەکە: لە دوای دەستبەکاربوونەوەی دۆناڵد ترەمپ وەک سەرۆکی ئەمریکا ئەمە سێیەم سەردانی نوێنەری تایبەتی سەرۆکی ئەمریکایە بۆ ڕووسیا، هەردوو وڵاتەکەش جەخت لەوەدەکەنەوە کە دەیانەوێت پەیوەندییە دوو لایەنەکانیان پەرەپێبدەن.

لێدوانی فەرمی: دیمیتری پیسکۆڤ، وتەبێژی سەرۆکایەتی ڕووسیا ڕایگەیاند، لە کۆبوونەوەکەدا ڤلادیمێر پووتین، سەرۆکی ڕووسیا گوێ لە پێشنیازەکانی نوێنەری ئەمریکا بۆ ڕۆژهەڵاتی ناوەڕاست دەگرێت و باس لە لایەنە جیاوازەکانی دۆخی ئۆکرایناش دەکرێت.

باکگراوند: لە کاتێکدا ئۆکراینا ڕازی بوو بە پێشنیازی ترەمپ بۆ ئاگربەستی بێ مەرج، و دواتر ڕازی بوو بە پلانەکانی ڕاگەیاندنی ئاگربەست لە سنوورە دەریاییەکان لەگەڵ ڕووسیا، ئەو وڵاتە کۆمەڵێک داواکاری نوێی خستووتەڕوو، لەنێویاندا هەڵگرتنی هەندێک لە سزاکانی ئەمریکا لەسەر وڵاتەکەیان.