کۆشکی سپی لە بارەی سەردانەکەی ترەمپ بۆ تورکیا: لە ماوەیەکی نزیکدا وردەکاری بڵاودەکەینەوە

ئاڤا نیوز

 

کۆشکی سپی لە بارەی سەردانەکەی ترەمپ بۆ ڕۆژهەڵاتی ناوەڕاست و تورکیا ڕایگەیاند، ئێستا لەسەر وردەکاری سەردانەکەی ترەمپ کاردەکەین، لە ماوەیەکی نزیکدا وردەکاری گەشتەکەی بۆ ڕۆژهەڵاتی ناوەراست و ئەو وڵاتانەی سەردانی دەکات، بڵاودەکەینەوە. 

وێنە گەورەکە: ئەم ڕوونکردنەوەیە دوای ئەوە دێت، دەنگۆی ئەوە بڵاوبووەتەوە، دۆناڵد ترەمپ، سەرۆکی ئەمریکا گەشتێک بۆ وڵاتانی ڕۆژهەڵاتی ناوەڕاست دەکات. بەگوێرەی هەواڵێکی کەناڵی تیڤی100ی تورکی، ترەمپ لە مانگی ئایار سەردانی تورکیا دەکات. 

لێدوانی فەرمی: کارۆلین لیڤیت، گوتەبێژی کۆشکی سپی سەبارەت بە گەشتەکەی ترەمپ بۆ ڕۆژهەڵاتی ناوەڕاست ڕایگەیاند: ئێستا کار لەسەر وردەکارییەکانی گەشتەکە دەکەین، دوای جێگیرکردنی ناوەڕۆکی سەردانەکە، لە نزیکترین کاتدا وردەکاری سەردانەکەی بڵاودەکەینەوە.

 

زانیاریی زیاتر: هاوکات، لیڤیت، گوتەبێژی کۆشکی سپی لە بارەی چاوپێکەوتنی نێوان ترەمپ و ئەردۆغان گوتی: "جگە لەو سەردانەی سەرۆک ترەمپ بۆ عەرەبستانی سعودیە، هیچ زانیارییەکم لەسەر سەردانەکانی دیکەی نییە، بەڵام ئەگەری هەیە وڵاتانی دیکەش لەنێو پلانی گەشتەکەیدا هەبن".

 

ئەوەی پێشبینی دەکرێت: چاوەڕێ دەکرێت، ترەمپ لە مانگی ئایاردا سەردانی هەریەک لە وڵاتانی سعودیە، قەتەر و ئیمارات بکات.