پەیامی نوێی سەدر لەبارەی هەڵبژاردنەوە

ئاڤا نیوز

ڕێبەری ڕەوتی نیشتمانی شیعە، نوێکردنەوەی کارتی بایۆمەتری لەلایەن ئەندام و لایەنگر و شوێنکەوتووانی بە "پێویست" دەزانێت تەنانەت ئەگەر بەشداری هەڵبژاردنیش نەکەن.

 

ئەوەی پێویستە بیزانیت: پێشتر ڕێبەری ڕەوتی نیشتمانیی شیعە لە وەڵامی پرسیاری یەکێک لە شوێنکەوتووانی سەبارەت بە بەشداریکردنی لەهەڵبژاردنەکانی داهاتووی عێراق  ڕایگەیاندبوو، " بەشداری هەڵبژاردنێکی پەککەوتوو ناکەم ". 

 

نووسراوی فەرمی: بەگوێرەی نووسراوێکی سەریا سەلام، باڵی سەربازیی ڕەوتی نیشتمانی شیعە کە ئاراستەی موقتەدا سەدر، ڕێبەری ڕەوتەکەی کردووە، ئاگاداری کردووەتەوە لەسەر نوێکردنەوەی داتای ئەندامانی ناوەندی سەریا سەلام لە ژمارەیەک پارێزگای عێراق و پرۆسەی نوێکردنەوەش لە چەند پارێزگایەکی دیکە.

 

لە هەمان کاتدا: سەریا سەلام، سەبارەت بە نوێکردنەوەی کارتی دەنگدانی بایۆمەتری، ئاماژە بۆ ئەوە دەکات لە چەند پارێزگایەک ئەندامانیان کارتەکانیان نوێکردووەتەوە و لە چەند پارێزگایەکیش پرۆسەکە بەردەوامە.

 

پەیامی فەرمی: لە وەڵامی ئەو پەیامەی سەریا سەلام، موقتەدا سەدر، ڕێبەری ڕەوتی نیشتمانی شیعە جەخت لەسەر پێویستی نوێکردنەوەی کارتی دەنگدان دەکاتەوە تەنانەت ئەگەر بایکۆتی هەڵبژاردنیشیان کردبێت و بەشداریی تێدا نەکەن و دەشڵێت: هەرکەسێک کارتەکەی نوێ نەکردبێتەوە، بایکۆتی هەڵبژاردنیش بکات هیچ کاریگەرییەکی نابێت.

 

 پێدراوە ڕاستەکان: ئەنجوومەنی وەزیرانی عێراق ڕۆژی 11-11-2025 بۆ بەڕێوەچوونی هەڵبژاردنی خولی شەشەمی پەرلەمانی عێراق دیاریکرد و کۆمیسیۆنیش ئامادەیی خۆی بۆ بەڕێوەبردنی دەربڕی.

 

ژمارەکان وادەڵێن: جومانە غەلای، وتەبێژی کۆمیسیۆنی باڵای سەربەخۆی هەڵبژاردنەکانی عێراق ڕۆژی 10ـی نیسان بە ئاڤا میدیای ڕاگەیاندبوو: لە 25-3-2025 تاوەکو 10ـی نیسان، 140 هەزار و 370 دەنگدەر تۆماری کارتەکانیان نوێکردووەتەوە.