فوئاد حوسێن: هەوڵەکان بۆ دووبارە هەناردەکردنەوەی نەوتی کوردستان بەردەوامە

ئاڤا نیوز

وەزیری دەرەوەی عێراق ئاشکرایکرد، بۆ دەستپێکردنەوەی هەناردەکردنی نەوت لەڕێگەی تورکیاوە، بەغدا کار بۆ ڕەخساندنی هەموو هەلومەرجێکی ناوخۆیی پێویست دەکات.

وێنە گەورەکە: دوای بڕیارێکی دادگای ناوبژیوانی نێودەوڵەتیی پاریس، ڕۆژی 25-3-2023، هەناردەکردنی نەوتی هەرێمی کوردستان بۆ تورکیا ڕاگیرا، بەو هۆیەوە عێراق زیاتر لە 23 ملیار دۆلار زیانی پێگەیشتووە.

لێدوانی فەرمی: لە پەراوێزی بەشداریکردنی لە خولی چوارەمی کۆڕبەندی دیپلۆماسی ئەنتاڵیا و لە چاوپێکەوتنێکدا لەگەڵ ئاژانسی ئانادۆڵی تورکی، فوئاد حوسێن، وەزیری دەرەوەی عێراق، ڕایگەیاند: بەهۆی پرسی یاساییەوە هەناردەکردنی نەوتی هەرێمی کوردستان ڕاگیراوە  و بابەتەکە پەیوەندی بە تورکیاوە نییە.

- گفتوگۆی سێ قۆڵی چڕ لە نێوان بەغدا و هەولێر و ئەو کۆمپانیا نەوتییانەی لە هەرێمی کوردستان کاردەکەن بەردەوامە، بۆ گەیشتن بە ڕێککەوتنێک کە ڕێگە بە دەستپێکردنەوەی هەناردەکردنی نەوت بدات.

- هیوادارم سەرجەم لایەنەکان بگەنە ڕێککەوتن بۆ دووبارە هەناردەکردنەوەی نەوتی کوردستانی عێراق لەڕێگەی تورکیاوە بۆ بازاڕەکانی جیهان.

ئەمەش بزانە: کۆڕبەندی دیپلۆماسی ئەنتالیا لە ناوەندی کۆنگرەی NEST لە ئەنتاڵیا دەستیپێکرد، بە میوانداری نزیکەی چوار هەزار بەشداربوو، لەنێویاندا زیاتر لە 20 سەرۆکی دەوڵەت و حکومەت، 50 وەزیری دەرەوە و نزیکەی 60 نوێنەری باڵای دامەزراوە نێودەوڵەتییەکان هەیە.