وەزیری دەرەوەی سووریا دەچێتە ئەمریکا

ئاڤا نیوز

 

لە درێژەی هەوڵەکانی حکومەتی نوێی سووریا بۆ بەهێزکردنی پەیوەندییە دیپلۆماسییەکانی، بڕیار وایە ئەم مانگە ژمارەیەک بەرپرسی باڵای حکوومەتی ڕاگوزەری سووریا سەردانی ئەمریکا بکەن.

 

زانیاریی بەدەستهاتوو: ئاژانسی ڕۆیتەرز ئاشکرایکردووە، بۆ بەشداری لە دیداری بەهارەی سندووقی دراوی نێودەوڵەتی، کە لە ڕۆژانی 20\21 مانگی نیسان بەڕێوەدەچێت، هەریەکە لە ئەسعەد شەیبانی، وەزیری دەرەوە، محەممەد یۆسر، وەزیری دارایی و پارێزگاری بانکی ناوەندیی سووریا سەردانی ئەمریکا دەکەن.

 

ئەوەی لەبارەیەوە دەگوترێت: لە دیدارەکانی بەرپرسانی سووریا لە ئەمریکا، هەوڵی کەمکردنەوەی سزاکانی سەر وڵاتەکەیان دەدەن.

 

لەلایەکی دیکە: تا ئێستا دیار نییە وەزیری دەرەوە و وەزیری دارایی سووریا ڤیزای ئەمریکایان وەرگرتووە یان نا، تاوەکوو سەفەرەکە بکەن.

 

زانیاریی زیاتر: ئەمە دەبێتە یەکەم سەردانی شاندێکی باڵای حکومەتی سووریا بۆ کۆبوونەوەیەکی لەمشێوەیە دوای نزیکەی 20 ساڵ. هاوکات یەکەم سەردانی بەرپرسانی باڵای سووریایە بۆ ئەمریکا دوای ڕووخانی دەسەڵاتی بەشار ئەسەد.