ئەحمەد شەرع کوردێک دەکاتە بەرپرسی یەکەمی شاری عەفرین

ئاڤا نیوز

 

سەرۆککۆماریی نوێی سووریا بۆ قۆناغی ڕاگوزەر، گەنجێکی کوردێکی تەمەن 34 ساڵ وەکو قایمقامی عەفرین لە ڕۆژئاوایی کوردستان دەستنیشان دەکات. 
 
وێنە گەورەکە: ئەحمەد شەرع، لەسەرەتایی دەستبەکاربوونیەوە جەختی لەوەکردووەتەوە کە پێویستە کوردیش هاوشێوەیەکی نەتەوەکانی دیکەی دانیشتووی سووریا بەپێی قەبارەی خۆیان بەشداربن لە وەرگرتنی بەرپرسیاریەتیی، ئێستا لە حکومەتی نوێی سووریا، دوو کورد پۆستیان هەیە یەکێک وەزیر و ئەوەی دووەمیشیان پۆستی قایقامی هەیە. 
 
لێدوانی فەرمی: سەرچاوەیەکی باڵای هەسەدە سەبارەت بە دانانی کەسێک بە قایمقامی عەفرین بە ئاڤا نیوزی ڕاگەیاند: ئەوکەسەی لەلایەن ئەحمەد شەرع دیاریکراوە کوردە و ناوی" مەسعود محەممەد ساڵح بەتالە" لە شاری قامیشلۆی ڕۆژئاوای کوردستان لەدایکبووە.
 
سەرچاوەکەی هەسەدە باسی لەوەشکردووە، دانانی مەسعود محەممەد بۆ ئەو پۆستە بەبێ ڕەزامەندی ئێمە بووە و پێشی ڕازی نین، دیاریکردنی پۆستەکان بەم جۆرە هەمان مامەڵە و بیرکردنەوەی رژێمی پێشووی بەشار ئەسەدە.
 
پڕۆفایلی قایمقامی نوێی عەفرین:-

 

-    ناوی تەواوی مەسعود محەممەد ساڵح بەتالە و لە ساڵی 1991 لە شاری قامیشلۆ لە دایکبووە.

-    هەڵگری بڕوانامەی بەکالۆریۆس و دەرچووی کۆلێژی سەربازییە. 
-    بەرپرسی پێشووی تەنسیقاتی شۆرش بووە لە دژی ڕژێمی پێشوو لە حەسەکە.
-    لەساڵی 2015 تا 2017 لە دەزگای ئاسایشی گشتیی کاری کردووە.
-    هاوکات ئەندامی لیژنەی دانووستانکاری تەحریرولشامە بووە بۆ گفتوگۆکردن لەگەڵ هەسەدە لەسەر ڕاسپاردەی ئەحمەد شەرع.

ئەوەی پێویستە بیزانیت: تاوەکو ئێستا پاراستنی عەفرین لەلایەن پۆلیسی خۆجێی سەربە حکومەتی نوێی سووریاوە بەڕێوە دەبرێت، هیچ گرووپێکی چەکداریی نزیک لە تورکیا لە شارەکە نەماوە. 

 

باکگراوند: لە ڕێککەوتی 10-3-2025 ڕێککەوتنێکی هەشت خاڵی لەنێوان ئەحمەد شەرع و مەزڵووم عەبدی واژۆکرا، ئەمەش بەمەبەستی تێکەڵکردنی چەکدارانی سوپای سووریا دیموکرات لەگەڵ سوپای فەرمی حکومەتی سووریا، هاوکات بەستنەوەی دامەزراوەکانی خۆسەر بە حکومەتی نوێ.