عێراق؛ ڕێکارەکانی دامەزراندنی نزیکەی شەش هەزار کەس تەواو بوون

ئاڤا نیوز

ئەنجوومەنی ڕاژەی فیدراڵی قۆناغی دووەمی ڕێکارەکانی دامەزراندنی هەزاران دەرچووی یەکەم و خاوەن بڕوانامە باڵاکانی تەواو کردووە.

وێنە گەورەکە: ئەنجوومەنی ڕاژەی فیدراڵی عێراق بەردەوامە لەسەر دامەزراندنی هەزاران پلەی وەزیفی بەگوێرەی پێویستی وەزارەتەکان و بە پشتبەستن بە یاسای ژمارە 59ـی ساڵی 2017 و یاسای ژمارە 67ـی ساڵی 2017، کە تایبەتە بە دامەزراندن و خستنە سەرکاری یەکەمەکانی زانکۆ و پەیمانگاکان.

لێدوانی فەرمی: سەعد لامی، وتەبێژی ئەنجوومەنی ڕاژەی گشتیی فیدراڵی ڕایگەیاند: قۆناغی دووەمی دامەزراندنی پێنج هەزار و 900 یەکەمە دەرچووەکان و خاوەن بڕوانامە باڵاکان تەواو بوون، داواکاران بەگوێرەی پسپۆرییەکانیان و پێداویستیی وەزارەتەکان بەسەر دامودەزگاکانی حکومەتدا دابەشکراون.

ئەوانەی دامەزراون لە ڕۆژانی داهاتوودا لە هەژماری تایبەتی خۆیان نامەیان پێدەگات، بەم زووانەش فەرمانی وەزاری سەبارەت بە دامەزراندنیان دەردەچێت.

زانیاریی زیاتر: سێ یەکەمەکانی زانکۆ و پەیمانگەکان لە هەرێمی کوردستان بایۆمەترییان کردووە و دوای پڕۆسەکە ناوی 10 هەزار کەسی شایستە بۆ دامەزراندن ماوەتەوە. لەپێناو دامەزراندنیان وەزارەتی خوێندنی باڵا نووسراوێکی  بۆ ئەنجوومەنی وەزیران کردووە بۆ ئەوەی داوا لە بە‌غدا بکرێت پارەیان بۆ دابین بکرێت، بەڵام چارەنووسیان هێشتا نادیارە.