سوودانی لەبارەی پڕۆژە پیشەسازییەکان داوایەک لە هەولێر و بەغدا دەکات

ئاڤا نیوز

سەرۆکوەزیرانی عێراق، داوا لە لایەنە پەیوەندیدارەکانی هەردوو حکومەتی فیدراڵی و هەرێمی کوردستان دەکات لەسەر ڕێکارەکانی یەکخستنەوە و خستنەڕووی ڕاسپاردەکان بۆ چارەسەرکردنی کێشە و ئاستەنگەکان، بەمەبەستی پاڵپشتیکردنی پڕۆژە پیشەسازییە هاوبەشەکان کۆببنەوە.

چیرۆکی سەرەکی: یەکشەممە 13ـی نیسان، محەممەد شیاع سوودانی، سەرۆکوەزیرانی عێراق، سەرۆکایەتی کۆبوونەوەی ئەنجوومەنی هەماهەنگیی پیشەسازی کرد. لە کۆبوونەوەکەدا میکانیزمی گەشەپێدانی پیشەسازی نیشتمانی تاوتوێکرا، جگە لە بەدواداچوون بۆ جێبەجێکردنی بڕیار و ڕێنماییەکانی کۆبوونەوەی پێشوو.

ڕاگەیێنراوی فەرمی: بەگوێرەی ڕاگەیێنراوی نووسینگەی سەرۆکوەزیرانی عێراق، لە میانی کۆبوونەوەکەدا سوودانی لایەنە پەیوەندیدارەکانی حکومەتی فیدراڵی و حکومەتی هەرێمی کوردستانی عێراقی ڕاسپارد دەستبکەن بە ئەنجامدانی کۆبوونەوەکان بۆ گفتوگۆکردن لەسەر ڕێکارەکانی یەکخستنەوە و خستنەڕووی ڕاسپاردەکان بۆ چارەسەرکردنی کێشە و ئاستەنگەکان، بەمەبەستی پاڵپشتیکردنی پڕۆژە پیشەسازییە هاوبەشەکان.

٠ بڕیاردرا کە سەرجەم پارێزگاکان لەماوەی 90 ڕۆژدا هەزار دۆنم زەوی ئامادە و تەرخان بکەن بۆ دامەزراندنی پڕۆژە پیشەسازییەکان کە لەلایەن بەڕێوەبەرایەتی گشتی گەشەپێدانی پیشەسازییەوەکانەوە دیاری کراوە.

٠ لە چوارچێوەی هەوڵەکانی حکومەت بۆ پاراستنی ژینگە، لە کۆبوونەوەکە پلانێکی وەزارەتی نەوت بۆ ئامادەکردنی گازی شل بۆ کارگەکانی خشت لەبری بەکارهێنانی سووتەمەنی نەوتی ڕەش پەسند کرا.