وەزارەتی دارایی عێراق پارەی دیكە دەخاتە سەر هەژماری هەرێمی كوردستان

ئاڤا نیوز

ئەندامێکی لیژنەی دارایی پەرلەمانی عێراق ئاشكرایكرد، لە سبەیەوە نزیکەی 568 ملیار دینار دەخرێتە سەر هەژماری وەزارەتی دارایی حکومەتی هەرێمی کوردستان لە بانکی ناوەندیی.

وێنە گەورەکە: وەزارەتی دارایی عێراق خەرجکردنی ڕەزامەندی دا بە خەرجکردنی پارە بۆ مووچەی خانەنشینانی مەدەنی و چاودێریی کۆمەڵایەتی کە بڕەکەی 130 ملیار دینار بوو، لە سبەیەوە بەشەکانی دیکە دەخاتە سەر هەژماری بانکی هەرێمی کوردستان.

لێدوانی فەرمی: سۆران عومەر، ئەندامی لیژنەی دارایی لە پەرلەمانی عێراق بە ئاڤا نیوزی گوت: "بەچوار لیست نزیکەی  568 ملیار دینار دەخرێتە سەر هەژماری وەزارەتی دارایی حکومەتی هەرێمی کوردستان، ئەم بڕە زیاد ناکرێت ئەو بەشەی ماوە، پێویستە هەرێمی کوردستان لەداهاتی ناوخۆ دابینی بکات."

زانیاريی زیاتر: لیستی یەکەم خانەنشینی مەدەنی و سەربازی بووە، لیستی دووەم خاوەن پێداویستی تایبەت، لیستی سێیەم کەسوکاری شەهیدو ئەنفالکراوان و  لیستی چوارەم   37 وەزارەت، دەستەو سەرۆکایەتیەکان و ئەنجوومەنی دادوەری بوو."

بۆچوونی لایەنی بەرامبەر: ئاڤا نیوز لە سەرچاوەیەكی وەزارەتی دارایی و ئابووری هەرێمی كوردستان زانیویەتی، بەهۆی ئەوەی ئەمڕۆ پشووی فەرمی بووە لە هەرێمی کوردستان هیچ پارەیەک لە وەزارەتی دارایی عێراقەوە نەگەیشتووەتە سەر هەژماری بانکی وەزارەتی دارایی هەرێمی کوردستان.

 

باكگراوند: ڕۆژی 21-02-2024، دادگەی فیدراڵیی عێراق هەردوو حكومەتی فیدراڵی و هەرێمی كوردستانی پابەند کرد بە دابینكردنی مووچەی مووچەخۆرانی هەرێمی كوردستان هاوشێوەی مووچەخۆرانی پارێزگاكانی عێراق.