پەرلەمانی عێراق لەبارەی دەنگدان بە پارێزگابوونی هەڵەبجە کۆدەبێتەوە

ئاڤا نیوز

ئەمڕۆ پەرلەمانی عێراق کۆدەبێتەوە و یەکەم بڕگەی دانیشتنەکەش دەنگدان دەبێت بە پرۆژەیاسای بەپارێزگابوونی هەڵەبجە.

 

وێنە گەورەکە: چەندین جار پرسی بەپارێزگابوونی هەڵەبجە خراوەتە خشتەی کاری پەرلەمانی عێراق بەڵام تاوەکو ئێستا ئەنجامی نەبووە.

 

ئەوەی ئێستا ڕوودەدات: بەگوێرەی کارنامەی دانیشتنی ئەمرڕۆی پەرلەمان کە شەش بڕگە لەخۆی دەگرێت، بڕگەی یەکەمیان دەنگدانە بە پڕۆژەیاسای بەپارێزگابوونی هەڵەبجە.

 

کارنامەی دانیشتنەکەی پەرلەمان بەم شێوەیەیە:

٠ دەنگدان لەسەر پرۆژەیاسای بەپارێزگابوونی هەڵەبجە.

٠ دەنگدان لەسەر پێشنیازی هەموارکردنی یاسای بنەماکانی هاوتاکردنی بڕوانامە و پلە زانستییەکانی عەرەبی و بیانی ژمارە 20ـی ساڵی 2020.

٠خوێندنەوەی یەکەم بۆ پێشنیازەیاسای هەمواری یەکەمی وەزارەتی پەروەردە.

٠ خوێندنەوەی دووەم بۆ پێشنیازەیاسای پاراستن و باشترکردنی ژینگە.

٠ خوێندنەوەی دووەم بۆ پرۆژەیاسای ئەندامبوونی عێراق لە ڕێککەوتنی 28ـی 7ـی 1998 سەبارەت بە جێبەجێکردنی بەشی 11ـی ڕێککەوتنی نەتەوەیەکگرتووەکان.

٠ خوێندنەوەی دووەمی پێشنیازی هەمواری یاسای پەرلەمان و پێکهاتەکانی ژمارە 13ـی ساڵی 2018.
 
 ئەوەی پێویستە بیزانیت: پەیوەست بە پرسی دەنگدان بۆ بەپارێزگابوونی هەڵەبجە، سەرجەم فراکسیۆنە کوردستانییەکان پێشتر ڕایانگەیاندبوو، بەشداریی هیچ دانیشتنێکی داهاتووی پەرلەمان نەکەن، ئەگەر پڕۆژەیاسای بەپارێزگابوونی هەڵەبجەی تێدا نەبێت.