نێچیرڤان بارزانی: عێراق بەرپرسیاريه‌تيی یاسایی و ئەخلاقی هەیە لە قەرەبووکردنەوەی کەسوکاری ئەنفالکراوان

ئاڤا نیوز

 

سەرۆکی هەرێمی کوردستان لە ساڵڕۆژی جینۆسایدی ئەنفالدا ڕایگەیاند، حکومەتی عێراق لە هەموو ڕوویەکەوە بەرپرسیارێتی یاسایی و ئەخلاقی لە قەرەبووکردنەوەی کەسوکاری ئەنفالکراوانی لەسەرە.

 

چیرۆکی سەرەکی: ئەمڕۆ یادی 37 ساڵەی شاڵاوی بەدناوی ئەنفالە، کە لەلایەن ڕژێمی بەعسی عێراقەوە ئەنجامدراوە و 182 هەزار ژن و منداڵ و پیاوی کوردستانی بە دڕندەترین شێوە جینۆساید کران.

 

پەیامی فەرمی: نێچیرڤان بارزانی، سەرۆکی هەرێمی کوردستان دەڵێت: هێشتا کاریگەرییە ئازاربەخشەکانی ئەنفال لە ویژدان و یادەوەری گەلەکەماندا ماوە، دووپاتی دەکەینەوە کە حکوومەتی فیدراڵی عێراق بەرپرسیاريه‌تيی یاسایی و ئەخلاقی لە قەرەبووکردنەوەی کەسوکاری ئەنفالکراوان له‌ هه‌موو ڕوويه‌كه‌وه‌ لەسەرە، پێويسته‌ بڕیاری دادگای باڵای تاوانەکانى عێراق جێبه‌جێ بكات، کە ئەنفالی وەک جینۆساید و تاوانی دژی مرۆڤایەتی ناساندووه‌.

 

- قەوارەی هەرێمی کوردستان و ده‌ستكه‌وته‌كانى، بەرهەمی قوربانیدانی شەهیدانن، لەم یادەدا داكۆكى له‌ یەکڕیزی و پێکەوەيى بۆ پاراستنی مافە دەستوورییەکانمان و بنیاتنانی داهاتوویەکی باشترى پڕ له‌ دادپەروەری و ئاشتی بۆ گەلى كوردستان، ده‌كه‌ينه‌وه‌.