سەرۆک بارزانی: تاوانبارانی ئەنفال كەوتنە زبڵدانی مێژوو بەڵام برین و ئاسەواری هەرماوە

ئاڤا نیوز

 

سەرۆک بارزانی لە ساڵیادی جینۆسایدی ئەنفال دا ڕایگەیاند، تاوانبارانی ئەنفال کەوتنە زبڵدانی مێژووەوە بەڵام برین و ئاسەوارەکەی هێشتا ساڕێژ نەبووە.

 

وێنە گەورەکە: ئەمڕۆ یادی 37 ساڵەی شاڵاوی بەدناوی ئەنفالە کە ڕژێمی بەعسی ڕووخاو دژ بە خەڵک و خاک و ژینگەی کوردستان ئەنجامیدا و لە زنجیرەیەک شاڵاوی یەک بەدوای یەکدا دەیان هەزار خەڵکی بێتاوانی کوردستانی ڕاپێچی بیابانەکانی باشوور و ناوەڕاستی عێراق کرد و لەگۆڕی بەکۆمەڵدا زیندەبەچاڵ و بێسەروشوێنی کردن.

 

پەیامی فەرمی: سەرۆک بارزانی دەڵێت: پڕۆسەی ئەنفال بەشێکی ئەو ستەم و تاوانە بوو، کە لە سەدەی ڕابردوودا لەلایەن ڕژێمی پێشووی عێراقەوە بە چەند قۆناغێک لە سەرجەم ناوچەکانی کوردستان دژبە گەلەکەمان ئەنجامدرا و 182 هاووڵاتی بێتاوانی بێشەروشوێن و شەهید کرد.

 

بەشێکی دیکەی قسەکانی سەرۆک بارزانی:- 

 

- کیمیاباران و سیاسەتی بەعەرەب کردن و ڕاگواستن و تێکدانی ژێرخانی ئابووری کوردستان و وێرانکردنی هەزاران گوند، بەشێکی دیکەی ئەو تاوانانە بوون، کە لەلایەن ڕژێمی بەعسەوە بەرامبەر گەلەکەمان ئەنجام درا.

 

- تاوانباران کەوتنە زبڵدانی مێژووەوە، بەڵام برین و ئاسەواری ئەو جینۆساید و زوڵمە هێشتا ماوە و ساڕێژ نەبووە، دەبێت دەوڵەتی عێراق قەرەبووی جینۆسایدی ئەنفال بکاتەوە، کە دژ بە میللەتەکەمان ئەنجام دراوە.

 

-پێویستە ڕێگە لە هەموو جۆرە تێڕوانین و سیاسەت و کردەوەیەکی شۆڤێنی لە دژی خەڵکی کوردستان بگیرێت.

 

-لە یادی 37 ساڵەی ئەنفال دا، باشترین وەفا بۆ شەهیدانی ئەنفال ئەوەیە کە هەموومان لە خزمەتکردن و پاراستنی وڵاتەکەمان یەک دەنگ و پێکەوەبین، هەروەها داهاتوویەکی گەش بۆ گەلەکەمان بوونیاد بنێین.

 

-سەربەرزی بۆ خانەوادە و كەسوكاری شەهیدان و ئەنفال، هەزاران سڵاو لە گیانی پاكی شەهیدانی ئەنفال و هەموو شەهیدانی ڕێگەی ئازادیی كوردستان.