کۆمپانیاکانی دانانی سیستمی وزەی خۆر بۆ ماڵان زیاد دەکرێن

ئاڤا نیوز

 

دوای ئەوەی حکومەتی عێراق دەرفەتی پێدانی قەرزی بە هاوبەشانی کارەبا ڕاگەیاند، ئێستا کۆمپانیاکانی بەشدار لە دانانی سیستمی وزەی خۆر ڕوو لەزیادبوونە و هاووڵاتیانیش پێشوازیان لێ کردووە.

 

وێنە گەورەکە: عێراق ساڵانێکی زۆرە وەبەرهێنان لە کەرتی کارەبا دەکات و تێچووێکی زۆری لەو بوارەدا خەرج کردووە، ئێستا دەیەوێت لە ڕێگەی پێدانی قەرزەوە، هاوبەشانی کارەبا هان بدات تاوەکو ڕوو لە دانانی سیستمی سۆلار پانێڵ بکەن تاوەکو لە ڕێگەی وزەی خۆرەوە کارەبا بۆ خۆیان دەستەبەر بکەن و بارگرانی لەسەر تۆڕی گشتیی کارەبا کەم بکەنەوە. 

 

ڕاگەیێنراویی فەرمی: زیاد فازڵ، وەزیری کارەبای عێراق ڕایگەیاند: 16 کۆمپانیای نوێی تایبەتمەند بە دانانی سیستمی وزەی خۆر لە ماڵان لە بانکی ناوەندی تۆمارکراون، بەمەش کۆی گشتیی کۆمپانیاکانی بەشدار گەیشتووەتە 24 کۆمپانیا.

 

زانیاریی زیاتر: هاووڵاتیان بە دوو ڕێگە دەتوانن ناوی خۆیان بۆ وەرگرتنی ئامێری یەکەی بەرهەمهێنانی کارەبا لە وزەی خۆری تۆمار بکەن، یەکەمیان؛ لەڕێگەی ماڵپەڕێک دەبێت. دووەمیشیان؛ ناو تۆمارکردنە لە بانکی ناوەندی دەبێت.