بەفەرمی هەڵەبجە بووە 19یەمین پارێزگای عێراق

ئاڤا نیوز

دوای 12 ساڵ لە دواخستنیی بە هۆکاری جۆراوجۆر، ئەمڕۆ پەرلەمانی عێراق کۆبووەوە و دەنگیدا لەسەر یاسای بەپارێزگابوونی هەڵەبجە.

وێنە گەورەکە: لە ساڵی 2014ـەوە حکومەتی هەرێمی کوردستان هەڵەبجەی بە فەرمی کردووە بە پارێزگا، بەڵام تا ئەمڕۆ، حکومەتی فیدراڵ وەک 19ـهەمین پارێزگای وڵاتەکەی مامەڵەی لەگەڵدا نەدەکرد، ئێستا دانیشتووانی هەڵەبجە بە نزیکەی 120 هەزار کەس دەخەمڵێنرێت و لەڕووی کارگێڕیشەوە لە دوو قەزا و سێ ناحیە پێکدێت.

لێدوانی فەرمی: سەگڤان یوسف، ئەندامی پەرلەمانی عێراق بە ئاڤا میدیای ڕاگەیاند، لە کۆبوونەوەی ئەمڕۆی پەرلەماندا، دەنگ لەسەر یاسای بەپارێزگابوونی هەڵەبجە درا و بەوەش هەڵەبجە بەفەرمی بووە 19ـهەمین پارێزگای عێراق.

زانیاریی زیاتر: بە گوتەی سەگڤان یوسف، لە کۆبوونەوەکەدا هەندێک پەرلەمانتار ویستیان خوێندنەوەی یەکەم بۆ پڕۆژەیاسای بە پارێزگابوونی تەلەعفەر بکەن، بەڵام بەهۆی ناکۆکی پڕۆژەکە تێنەپەڕی و بەشێک لە پەرلەمانتارانیش پێداگربوون کە بابەتی دروستکردنی پارێزگا تەنیا لە دەسەڵاتی ئەنجوومەنی وەزیران دایە و ناکرێت ئەم پڕۆژەیاسایە لەناو پەرلەمانەوە ئامادە بکرێت و خوێندنەوەی بۆ بکرێت.