شاندێکی حکومەتی سووریا و هاوپەیمانان دەچنە بەنداوی تشرین

ئاڤا نیوز

شاندێکی حکومەتی سووریا بەهاوبەشی لەگەڵ هێزەکانی هاوپەیمانی نێودەوڵەتی سەردانی بەنداوی تشرینیان کرد، ئەوەش بە ئامانجى زیاتر ئاساییکردنەوەى ئالۆزییەکانی ناوچەکە.

وێنە گەورەکە: لە 2025-03-10، ڕێککەوتنێکی مێژوویی هەشت خاڵی لە نێوان مەزڵووم عەبدی و ئەحمەد شەرع، لەبارەی بەستنەوەی ئیدارەی خۆسەر بە حکومەت و چوونی هێزەکانی هەسەدە بۆ نێو سووپای سووریا واژۆ کرا، تا ئێستاش بەشێک لە خاڵەکانی ڕێککەوتنەکە جێبەجێ کراون و بڕیارە ئەوانی دیکەش جێبەجێ بکرێن.

لێدوانی فەرمی: بەپێی میدیاکانی سووریا، ئەمڕۆ دووشەممە، لەسەر ڕاسپاردەی ئەحمەد شەرع، سەرۆککۆماری سووریا، شاندێکی باڵای حکومەتی دیمەشق بەیاوەری هێزێکی هاوپەیمانی نێودەولەتی گەیشتوونەتە بەنداوی تشرین و هەردوولا داوای پاراستنی بەنداوەکە و دوورکەوتنەوەی لە شەڕ وئاڵۆزییەکان دەکەن.

زانیاریی زیاتر: سەرجەم ئەو زیانانەی بەر بەنداوەکە کەوتوون، دۆکیۆمێنت کراون بەنداوەکەش سەر لەنوێ نۆژەندەکرێتەوە، دواتر بە پێی ڕێککەوتنێک ئەرکی پاراستی ڕادەستی حکومەتی نوێی سووریا دەکرێت.

ئەوەی پێویستە بیزانیت: بە گوێرەی زانیارییەکان چاوەڕێ دەکرێت ئاگربەستی هەمیشەیی لەنێوان هەسەدە و تورکیا لە بەنداوی تشرین و دەورووبەری ڕابگەیێندرێت.

باکگراوند: بەنداوی تشرین دەکەوێتە نزیک شاری منبج، 115 کیلۆمەتر لە شاری حەلەب و 80 کیلۆمەتر لە سنووری تورکیا دوورە، لە ساڵی 1999 بە ئامانجی گلدانەوەی ئاو و دەستکەوتنی وزەی کارۆئاوی لەسەر رووباری فورات بونیادنراوە، لەدوای ئاڵۆزبوونی دۆخی سووریا لە ساڵی 2014 لەلایەن چەکدارانی داعشەوە کۆنتڕۆڵکرا و ساڵێک دواتر لەلایەن هێزەکانی هەسەدە بە هاوکاری هێزەکانی هاوپەیمانی نێودەوڵەتی توانرا کۆنتڕۆڵ بکرێتەوە و تا ئێستاش لەژێر دەسەڵاتی ئەواندا ماوەتەوە.