ئەحمەد شەرع بۆ یەکەمجار سەردانی قەتەر دەکات

ئاڤا نیوز

 

ئەحمەد شەرع، سەرۆککۆماری ڕاگوزەری سووریا بۆ یەکەمجار سەردانی قەتەر دەکات و لەگەڵ تەمیم بن حەمەد، میری ئەو وڵاتەکە کۆدەبێتەوە.

 

وێنە گەورەکە: دوای ئەوەی ڕێککەوتی 13-4-2025، ئەحمەد شەرع، سەرۆککۆماری سووریا بۆ قۆناغی ڕاگوزەر گەیشتە ئیمارات و لەگەڵ شێخ محەممەد بن زاید، سەرۆکی ئیمارات و بە ئامادەبوونی ژمارەیەک وەزیر و بەرپرسی باڵای هەردوو وڵات کۆبووەوە، ئەمڕۆ سەردانی قەتەریش دەکات.

لێدوانی فەرمی: ئەسعەد شەیبانی، وەزیری دەرەوەی سووریا ڕایگەیاند: "ڕۆژی سێشەممە 15-4-2025، دوای دەستبەکاربوونی ئەحمەد شەرع وەک سەرۆککۆماری سووریا بۆ قۆناغی ڕاگوزەر، بۆ یەکەمجار بە یاوەری شاندێکی باڵا  سەردانی قەتەر دەکات؛ ئەو وڵاتەی هەر لەسەرەتاوە لەگەڵامن وەستاوە". 

زانیاریی زیاتر: شەرع لە دوای دەستبەکاربوونی وەک سەرۆککۆماری سووریا، سەردانی چەندین وڵاتی عەرەبی کردووە کە بریتیین لە سعودیە، ئوردن و میسر، ئیمارات، بۆ پەرەدان بە پەیوەندییە دیپلۆماسییەکانی لەگەڵ ئەو وڵاتانە.

باکگراوند: لە مانگی یەکی ئەمساڵ تەمیم بن حەمەد، میری قەتەریش سەردانی سووریای کرد و بووە یەکەمین سەرکردەی عەرەب لە دوای ڕووخانی دەسەڵاتی ئەسەدەوە سەردانی دیمەشق بکات و لەگەڵ ئەحمەد شەرع کۆبووەوە و پاڵپشتی وڵاتەکەی بۆ سووریا دووپاتکردەوە.