ئێران: باسکردنی ‌توانا سەربازییەکانمان  هێڵی سوورە

ئاڤا نیوز

سوپای پاسداران پێش دەستپێکردنی دووەم خولی دانووستانی ناڕاستەوخۆی ئێران و ئەمریکا دووپاتیکردەوە، توانا سەربازییەکانمان هێڵی سوورن.

وێنەگەورەکە: بڕیارە ڕۆژی شەممەی داهاتوو دووەم خولی دانووستانی ناڕاستەوخۆ لە نێوان شاندی ئێران و ئەمریکا سەبارەت بە بەرنامە ئەتۆمییەکەی بەڕێوەبچێت و پێش دەستپێکردنیشی ئێران دووپاتیکردەوە توانای سەربازیی ئێران هێڵی سوورە.

ڕاگەیێنراوی فەرمی: وتەبێژی سوپای پاسداران لە بەیاننامەیەکدا ڕایگەیاند: ئاسایشی نەتەوەیی، بەرگری و توانا  سەربازییەکانی  هێڵی سوورە بۆ کۆماری ئیسلامی ئێران و لە هیچ بارودۆخێکدا ناتوانرێت باسی لێوە بکرێت.

ئەوەی لەو بارەیەوە دەگوترێت: ئێران دەیەوێت دانووستانەکانی خوولی دووەم بە شێوەی ناڕاستەوخۆ بمێننەوە و تەنیا لەسەر پرسی ئەتۆمی و هەڵوەشاندنەوەی سزاکان بێت.

قووڵتر: بڕیار وابوو خولی دووەمی دانووستانەکانی ئێران و ئەمریکا لە ڕۆمای پایتەختی ئیتاڵیا بەڕێوەبچێت و ئەو وڵاتە ئامادەیی خۆی بۆ پێشوازیکردن لەو دانووستانانە دووپاتکردەوە، بەڵام وەزارەتی دەرەوەی ئێران دەڵێت، دانووستانەکان وەک خولی یەکەم لە مەقەستی پایتەختی عومان بەردەوام دەبن.

ئەمەش بزانە: ئێران نکۆڵی لە هەبوونی چەکی ئەتۆمی دەکات، ئەمریکاش گەشەکردن و پیتاندنی یۆرانیۆم بە مەترسی بۆ سەر خۆی دەزانێت، بە تایبەت کە ئێران بە بڕبڕەی پشتی (بەرەی موقاوەمە) دادەنرێت و لە پاش ڕووخانی ڕژێمەکەی بەشار ئەسەد و گۆڕانکارییەکانی ناو ڕۆژهەڵاتی ناوەڕاست چاویان لەوە بڕیوە و ئامانجی داهاتوو گرووپە چەکدارەکانی ئێران بێت.

باکگراوند: گفتوگۆی ئەتۆمی  نێوان ئێران و ئەمریکا بۆ ساڵی 2015 دەگەڕێتەوە، لە پاش گۆڕانی کابینەی باراک ئۆباما   بۆ کۆمارییەکان بە سەرۆکایەتیی  دۆناڵد ترەمپ، گفتوگۆی ئەتۆمی پەکخرا و کۆتایی پێهات، لە پاش گەڕانەوەی دۆناڵد ترەمپ لەمانگی یەکی ئەمساڵدا و لە مانگی سێ نامەیەکی بۆ ڕێبەری باڵای ئێران عەلی خامنەیی نارد و هۆشداری ئەوەی دا ئەگەر ئێران بە گفتوگۆی ئەتۆمی ڕازی نەبێت ئەوا باجی قورس دەدەن و ئەمجارە تەنها بە سەپاندنی سزای ئابووری ناوەستن بگرە هەنگاوی سەربازیش دەنێن.