ڕێبەر ئەحمەد: حکومەتی هەرێمی کوردستان پلان و بەرنامەی نوێی بۆ هەڵەبجە هەیە

ئاڤا نیوز

 

دوای ئەوەی هەڵەبجە بوو بە پارێزگا، حکومەتی هەرێمی کوردستان بۆ زیاتر ئاوەدانکردنەوە و خزمەتکردنی شارەکە، پلان و بەرنامەی نوێی هەیە و لە داهاتوودا جێبەجێیان دەکات.

 

چیرۆکی سەرەکی: لە 14-4-2025 پڕۆژەیاسای بەپارێزگابوونی هەڵەبجە لەلایەن پەرلەمانی عێراقەوە دەنگی لەسەر درا و هەڵەبجە بووە 19ـەمین پارێزگای عێراق و چوارەم پارێزگای هەرێمی کوردستان.

 

لێدوانی فەرمی: ڕێبەر ئەحمەد، وەزیری ناوخۆی هەرێمی کوردستان لە پەراوێزی دیداری سلێمانی بە ڕۆژنامەوانانی گوت: هەڵەبجە لەلایەن هەرێمی کوردستانەوە دەمێکە وەکو پارێزگا مامەڵەی لەگەڵ دەکرێت، پەرلەمان و حکومەتی عێراق وەک پێویست مامەڵەیان لەگەڵ هەڵەبجە نەکردووە، حکومەتی هەرێمی کوردستان پلان و بەرنامەی زۆر باشی بۆ هەڵەبجە هەیە، کە دوای بەپارێزگابوونی شارەکە جێبەجێیان دەکات و هەڵەبجە زیاتر ئاوەدان دەکاتەوە.

 

لەلایەکی دیکەوە: ڕێبەر ئەحمەد لە وەڵامی پرسیارێکی پەیامنێری ئاڤا سەبارەت بە پێکهێنانی کابینەی نوێی حکومەت گوتی: هەرێمێکی سەقامگیر گرنگە بۆ کۆمەڵگەی نێودەوڵەتی بۆ ئەوەی بتوانێت ڕۆڵی خۆی بگێڕێت لە عێراق و ناوچەکە.

 

زانیاریی زیاتر: وەزیری ناوخۆ لەبارەی ماددەی هۆشبەریشەوە گوتی، ماددەی هۆشبەر لەسەر ئاستی عێراق و ناوچەکەش بووەتە مەترسیی گەورە، لایەنە ئەمنییەکانی هەرێمی کوردستان بە هەماهەنگی بۆ کەمکردنەوە و نەهێشتنی مەترسییەکانی ماددەی هۆشبەر کار دەکەن، هەرچەندە لە عێراق ماددەی هۆشبەر هەڕەشەیە بۆ سەر کۆمەڵگە، بەڵام لە هەرێمی کوردستان تا ئێستا نەبووەتە دیاردەیەکی مەترسیداری کۆمەڵایەتی.