سەرەتای هەفتەی داهاتوو لیستی مووچە بۆ بەغدا ڕەوانە دەکرێت

ئاڤا نیوز

گوتەبێژی جێگری سەرۆک وەزیرانی هەرێمی کوردستان دەڵێت، ئامادەکردنی لیستی مووچەی مانگی چوار لە قۆناغی کۆتاییدایە و سەرەتای هەفتەی داهاتوو ڕەوانەی بەغدا دەکرێت.

وێنە گەورەکە: وەزارەتی دارایی و ئابووری هەرێمی کوردستان چەند ڕۆژێکە بەچڕی کار لەسەر ئامادەکردنی لیستی مووچەی مانگی چوار، میزان موراجەعە و ناردنی داهاتی مانگی سێ دەکات، بۆ ئەوەی لە زووترین کاتدا ڕەزامەندی خەرجکردنی مووچە لە بەغداوە بێت و دەست بەدابەشکردنی مووچەی مانگی چوار بکرێت.

لێدوانی فەرمی: سەمیر هەورامی، گوتەبێژی جێگری سەرۆکوەزیرانی هەرێمی کوردستان لە کۆنگرەیەکی ڕۆژنامەوانیدا گوتی، "لیستی مووچەی مانگی چوار لە تەواو بوونە، بڕیارە سەرەتای هەفتەی داهاتوو ڕەوانەی بەغدا بکرێت."

ئەمەش بزانە: ئاڤا زانیویەتی داهاتی ناوخۆ کۆکراوەتەوە، ئەم مانگە نزیکەی 49 ملیار دینار ڕادەستی وەزارەتی دارایی عێراق دەکرێت، هاوکات بڕیارە هەفتەی داهاتوو شاندێکی تەکنیکی وەزارەتی دارایی و ئابووریی هەرێمی کوردستان بچێتە بەغدا بۆ وەڵامدانەوەی هەر پرسیار و تێبینییەک لەبارەی لیستی مووچەی مانگی چوارەوە.