خانەنشینان بۆ یەکەمجار لەڕێگەی هەژماری من مووچە وەردەگرن

ئاڤا نیوز

خانەنشینان بۆ یەکەمجارە لە ڕێگەی هەژماری منەوە مووچەکانیان وەردەگرن و هەفتەی داهاتووش کارتەکانیان وەردەگرنەوە.

چیرۆکی سەرەکی: لە ماوەکانی ڕابردوودا دەیان دیمەن و ڤیدیۆی ناخهەژێن بڵاوکرایەوە کە خانەنشینان لە دوای  نوێژی بەیانییەوە  بە سەرمای زستان و گەرمای هاوین و بە باو باران، لەبەردەم بانکەکان نۆرەیان بۆ وەرگرتنی مووچەکانیان دەبەست. سەرەڕای ئەمانەش، هەندێک جار پێیان دەوترا پارە لە بانک نەماوە و ڕۆژێکی تر وەرنەوە.

ئەوەی پێویستە بیزانیت: تۆمارکردنی ناوی خانەنشینان لە هەژماری من ماوەیەکە دەستی پێ کردووە، لە هەفتەی داهاتووەوە مامەڵەی چوار هەزاریان تەواو دەبێت و نامەیان بۆ دەچێت، بۆئەوەی بچن کارتەکانیان وەربگرنەوە و پارەی پێ ڕابکێشن.

ئەمەش بزانە: ئەم چوار هەزار خانەنشینە لە سنووری قەزای عەنکاوەی هەولێرن و ئەوانەن پێش سەرەتای ئەمساڵ خانەنەشین بوون.

لێدوانی فەرمی: تیمی هەژماری من بە ئاڤای وت، هەفتەی داهاتوو ئەو چوار هەزار خانەنشینە کارتەکانیان وەردەگرنەوە، بەڵام یەکلایی نەبووەتەوە کە مووچەی مانگی چوار لە ڕێگەی هەژماری من وەردەگرن یان دەکەوێتە مانگی پێنج.

- کار لەسەر ئەوە دەکرێت ئامێری تایبەتی ڕاکێشانی پارەیان بۆ دابنرێت، چونکە توێژیکی تایبەتن و دەبێ ستافێکی تایبەتیان بۆ دابین بکرێت تاوەکو هیچ گرفتێکیان بۆ دروست نەبێت.

- هەر بەمزووانە تۆمارکردنی خانەنشینانی نوێش لە هەژماری من دەست پێدەکات، "ئێمەش هیوادارین بەخێرایی سەرجەمیان تۆمار بکرێن کە ژمارەیان نزیکەی 300 هەزار کەس دەبێ".