سەرۆکی لوبنان: ئەزموونی حەشدی شەعبی لە لوبنان دووبارە ناکەینەوە

ئاڤا نیوز

سەرۆکی لوبنان، بڕیاری چەکداماڵینی هێزەکانی دەرەوەی سوپای وڵاتەکەی ئاشکرا دەکات و دەڵێت، "ئەزموونی هێزەکانی حەشدی شەعبی لە لوبنان دووبارە ناکەینەوە".

لێدوانی فەرمی: جۆزێف عەون، سەرۆکی لوبنان لەچاوپێکەوتنێکی تەلەفزیۆنیدا ڕایگەیاند: بڕیاری چەکداماڵین و سنووردارکردنی هەڵگرتنی چەک لەدەرەوەی هێزە ئەمنییەکان دراوە و کۆتایی پێهاتووە، ئەوەی ماوەتەوە جێبەجێکردنی بڕیارەکەیە.

- هیچ هێزێکی سەربازی سەربەخۆ لە چوارچێوەی سوپای لوبنان دانامەزرێت و بەهیچ شێوەیەکیش ئەزموونی هێزەکانی حەشدی شەعبی عێراق لە لوبنان دووبارە ناکەینەوە.

- دوای ئەنجامدانی مەشق و ڕاهێنان،  ئەندامانی حیزبوڵڵا تێکەڵ بەسوپا دەکرێن، وەک ئەوەی لە کۆتایی شەڕی ناوخۆی وڵاتەکەی لە سەرەتای نەوەدەکاندا ڕوویدا.

- ئەو گۆڕانکارییانەی لە سووریا ڕوویاندا و هەڵوێستی تاران بەرامبەر بە حوسییەکان و هێزەکانی حەشدی شەعبی یارمەتیدەرن بۆ سەرکەوتنی پڕۆژەی سنوورداکردنی چەک لەدەستی دەوڵەتدا.

- کارەکانی سوپای لوبنان لە باشوور و بیقاع، لە چوارچێوەی جێبەجێکردنی بڕیارنامەی 1701ـی ئەنجوومەنی ئاسایشی نێودەوڵەتی سەبارەت بە داخستنی تونێل و دەستبەسەرداگرتن و لەناوبردنی کۆگاکانی تەقەمەنی حیزبوڵڵا، بەبێ هیچ بەربەستێک لەلایەن ئەو حیزبەوە بەڕێوەدەچێت.